فى السطور التالية سنقوم باستدعاء شخصيتى كارتون ديزنى الشهيرتين تيمون وبومبة ليتحدثا عن الواقع المصرى بعد أن فاق أفلام الكارتون فى كوميديته. بصراحة ولِمَ لا؟ "إشمعنى الإتنين دول بالذات ما يتكلموش"؟ إنهما شخصيتان تم تمصيرهما بامتياز ومنحهما حق اللجؤ لتراثنا الكوميدى منذ أكثر من عشرين عاماً، لذا يصير من حقهما التعبير عن أحوالنا مثل كل مصرى أصيل يدلى برأيه على نهج تيمون دون دراية وبثقة لا حدود لها فى قضايا مصيرية يخوض المعارك الضارية دفاعاً عنها بالفهلوة لينتصر لشخص أو لتيار سياسى قبل أن يبذل جهداً لتقصى الحقائق والإستماع لوجهات النظر المختلفة ودراستها. فهيا بنا نستمع لحوارهما. إيه رأيك يا تيمون فى موضوع الجزيرتين اللى إسمهم تيران وصنافير دول؟ متهيألى يا بومبة تيران دى جزيرة كلها مشاكل ويستحسن نخلص منها لأنها مليانه تيران بس ومفيهاش بقر خالص! تخيل إنت بقى لما يبقى عندك جزيرة بالشكل ده؟ أكيد كل التيران دول حيبقوا نازلين نطح وبهدلة ف بعض طول الليل والنهار ومش ممكن أى حكومة حتقدر تستفيد منها ولا حتعرف تاخد منهم حق ولا باطل! آ.. آ.. بس فيه ناس بتقول يا تيمون إنها جزيرة فاضية لكنها مهمة للأمن القومى بتاعنا لأنها مفتاح المخرج الجنوبى لقناة السويس دا كلام فارغ يا بومبة! خدها منى وما تسمعش كلام حد تانى لإنى فاهم الموضوع دا كويس جداً طيب وإيه رأيك فى جزيرة صنافير يا تيمون؟ أنا مبسوط إنك سألتنى السؤال ده يا بومبة؟ واضح جداً من إسمها إن مفيهاش غير حجر صنفرة زى اللى بندعك بيه كعوب رجلينا واحنا بنستحمى! واحنا عندنا منه تلال متلتلة فى الصحرا أكتر من الهم عالقلب! ليه نتعب نفسنا ونروح نجيبه من آخر الدنيا؟ دى عملية غير مجدية إقتصادياً يا سلام؟ معقولة يا تيمون؟ زى ما باقولك كده يا بومبة معلش يا تيمون خدنى على قد عقلى، أنا برضه رأيى إننا لازم نتعب نفسنا شوية قبل ما نقول إن الجزيرتين دول ما يلزموناش. يعنى مثلاً نعمل لجان قانونية وعسكرية وندرس الوثائق وندى فرصة للمؤرخين والمفكرين وخبراء وزارة الخارجية يقولوا رأيهم ونفتح قنوات للحوار المجتمعى وبعد كل دا نطرح النتائج والدراسات والتوصيات على مجلس النواب، وحتى لو المجلس قال إنهم ما يلزموناش نعمل استفتاء للشعب يقول رأيه ما هو ده اللى انا قلته بالظبط يا بومبة! لأ، إنت ما قلتش كده يا تيمون! إنت اللى مفهمتنيش كويس يا بومبة! أنا موافق على كل كلامك وحنعمل كل اللى بتقوله يا سيدى بس بعد ما نخلص منهم ومن مشاكلهم الأول! واهو برضه جايز نطلع منهم بقرشين حلوين بدل ما هما مركونين كده! بصراحة أنا تعبت من كتر الكلام والمناهدة معاك يا تيمون وصنافير بطنى صوصوت! آسف، إتلخبطت قصدى عصافير بطنى صوصوت حلو قوى، طالما جعان يبقى يلا بينا ندور على شوية حشرات ناكلهم التفكير وحش على بطن فاضية! آ.. على فكرة يا تيمون بيقولوا فيه حشرات نادرة وطعمها زى اللوز فى الجزيرتين دول! لأ! مش كنت تقول كده من الأول يا بومبة؟! يبقى ما يتباعوش قبل ما نخلص على كل الحشرات اللى فيهم! بينا نطير على هناك! ماشى يا تيمون بس حنتصرف إزاى مع التيران اللى بينطحوا بعض فى الجزيرة؟ تيران مين يا عم بومبة؟! صنفر مخك معايا وخلينا نلحق نقرمشلنا كام حشرة قبل ما يشيلوا اليافطة! الواقع مؤلم ولكنه يبعث على الضحك ويستدعى السخرية. الجميع يتصايحون ولا أحد ينصت لأحد رغم وجود قواعد واضحة إتفق البشر على أهمية وضرورة القيام بها قبل اتخاذ أية قرارت متعجلة تمس حدودهم وأمنهم القومى على وجه التحديد، ولكن من بيدهم السلطة يضربون بها للأسف عرض الحائط ويجدون من ينتصر لهم مثل تيمون ولا يجد مانعاً من الدخول فى مشاحنات مع صديقه بومبة متبنياً الدفاع عن وجهة نظر لا يفهمها!
