وجهت رولا حسين، شقيقة الإعلامي الشاب شادي حسين، مراسل برنامج "أبلة فاهيتا"، بعد واقعة إهانته للشرطة الأخيرة. وقالت "رولا"، عبر صفحتها على "فيسبوك": "كلمتين لبعض من أسرة برنامج أبلة فاهيتا والشركة المنتجة، إنتوا عارفين إن شادي كان بيعتبركم من عيلته لما كان بيتكلم عنكم؟، أكيد كان قصده على شوية ناس جوا اللي هما فعلًا بيسألوا عنه دلوقتي ومتضامنين معاه". وأضافت: "إنتوا عارفين إن شادي مؤخرًا كان شبه مختفي عن أصحابه وأهله عشان شغله معاكم لوقت متأخر ومشاركته بنفسه في كل خطوة في تقريره من الفكرة للمونتاج لحد ما يخرج التقرير في شكله النهائي اللي بيجيب أعلى نسبة مشاهدة على cbc عامة مش على فقرات البرنامج بس؟". وتابعت: "انتوا عارفين إن في ناس ابتدت تتفرج عليكم بس عشان تقارير شادي؟، فاكرين لما انتوا اللي كلمتوه وعرضتوا عليه يشتغل معاكم لما لقيتوه بيعمل تقارير لوحده وناجح فيها من قبل مايعرفكم؟، هو مش كان عاجبكم خفة دمه؟ كنتم فاكرينه بيضحك الناس وخلاص وهو كان بيوصل فكرة معينه". وأكملت: "شادي بتاع الكوميديا السودا اللي بيضحك بس بدموع, شادي اللي عمل قيمة لبرنامج الناس كانت بتستخف بيه، حقكم تعلنوا إنكم مش مسؤولين عن اللي بيعمله ولا حتى متضامنين معاه، هو راجل شجاع وقلبه ميت وعنده أحلام مش أي حد مطالب يدعمه أو يتضامن معاه". واستطردت: "كنتم هتبقوا محترمين وهنقدركم أكتر لو اكتفيتم بأنكم تقولوا إن الفيديو مش خاص للبرنامج وإن دي حاجة شخصية وبس كده، بس لما تيجي منكم انتم إنكم أصلًا رافضين آخر فيديو ليه عشان فيه لامؤخذة إساءات ومحتوى مسئ ينافي الآداب والأخلاقيات العامة ولا يتحلى بالمسؤولية والاحترام!، بعتوا الولد علطول كده!". واختتمت: "انتم مدركين أن معظم الناس بتكرهكم واللي كانوا بيحبوكوا انتم خسرتوهم بالبيان ده!، وعلى رأي باسم يوسف "اخص على قلة الأصل".