شقيقة شادي حسين لأبلة فاهيتا: «اخص على قلة الأصل»

هاجمت رولا، شقيقة شادي حسين، مراسل «برنامج أبلة فاهيتا»، القائمين على البرنامج لتخليهم عنه، قائلة: «على رأي باسم يوسف (اخص على قلة الأصل)».
وتابعت «رولا»، في صفحتها على «فيس بوك»: «كلمتين (لبعض من أسرة برنامج أبلة فاهيتا والشركة المنتجة انتوا عارفين إن شادي كان بيعتبركم من عيلته لما كان بيتكلم عنكم؟، أكيد كان قصده على شوية ناس جوه اللي هما فعلا بيسألوا عنه دلوقتي ومتضامنين معاه».
وتابع: «انتوا عارفين إن شادي مؤخراً كان شبه مختفي عن أصحابه وأهله عشان شغله معاكم لوقت متأخر ومشاركته بنفسه في كل خطوة في تقريره من الفكرة للمونتاج لحد ما يخرج التقرير في شكله النهائي اللي بيجيب أعلى نسبة مشاهدة على cbc، مش على فقرات البرنامج بس؟، انتوا عارفين ان في ناس ابتدت تتفرج عليكم بس عشان تقارير شادي؟».
وأردفت: «فاكرين لما انتوا اللي كلمتوه وعرضتوا عليه يشتغل معاكم لما لقيتوه بيعمل تقارير لوحده وناجح فيها من قبل مايعرفكم؟، مش كان عاجبكم خفة دمه؟ كنتم فاكرينه بيضحك الناس وخلاص وهو كان بيوصل فكرة معينه».
واستكملت: «شادي بتاع الكوميديا السودا اللي بيضحك بس بدموع، شادي اللي عمل قيمة لبرنامج الناس كانت بتستخف بيه، حقكم تعلنوا إنكم مش مسؤولين عن اللي بيعمله ولا حتى متضامنين معاه، هو راجل شجاع وقلبه ميت وعنده أحلام فا مش أي حد مطالب يدعمه أو يتضامن معاه، كنتم هتبقوا محترمين وهنقدركم اكتر لو اكتفيتم بأنكم تقولوا أن الفيديو مش خاص للبرنامج وان دي حاجة شخصية وبس كده، بس لما تيجي منكم انتم إنكم أصلا رافضين آخر فيديو ليه عشان فيه لامؤاخذة «إساءات ومحتوى مسيء ينافي الآداب والأخلاقيات العامة ولا يتحلى بالمسؤولية والاحترام»»؟
وتابع: «بيعتوا الولد علطول كده، أنتم مدركين أن معظم الناس بتكرهكم واللي كانوا بيحبوكوا انتم خسرتوهم بالبيان ده».