عمرو سمير عاطف يوضح سببب عدم دعوته لحفل «القنوات المتخصصة»

أثار عدم دعوة السيناريست عمرو سمير عاطف للحفل الذي أقامته قنوات النيل المتخصصة مساء أول من أمس اندهاشه إذ شارك في سباق دراما رمضان الماضي بعملين هما "بعد البداية"، و"لعبة إبليس"، وتم تكريم نجومهما.
عمرو أوضح عبر صفحته الشخصية في موقع التواصل الاجتماعي "فيسبوك" أنه بدافع الفضول داخله قام بإجراء مكالمة هاتفية لرئيسة قناة النيل للدراما المسؤولة عن الحفل إيناس عبد الله، وسألها عن سبب دعوته.
وكتب المؤلف ساخرا: "بدافع من الفضول حبيت أعرف انا ليه ماحدش عزمنى على حفل قنوات النيل أو القنوات المتخصصه عشان أتكرم أنا كمان زى ما تقريبا كل مصر اتكرمت وخصوصا إنى كتبت السنه اللى فاتت مسلسلين أعتقد يعنى أنهم نجحوا بعد البداية ولعبة إبليس ده طبعا غير بكار فقلت أطمن يمكن يكون فيه مثلا لا قدر الله موقف منى بسبب رأي قلته ولا كلمه اتنقلت عنى زعلت حد مهم فقالهم ما يصحش كدة، وأهه الواحد يلحق يجهز شنطته ويخلع قبل ما الموضوع يكبر إنما أنا عارف أن التكريم ده مجرد مجامله لطيفه وحاجه أنا باعتبرها بتفرح العيال يعنى بابا بياخد جايزه وكده ويستنونى إما أرجع عشان يلعبوا بيها بدل ما أشتريلهم لعبة".
وأضاف: اتصلت بإيناس عبد الله رئيسة النيل للدراما وقلتلها أنا فلان قالتلى فلان مين قلتلها أنا سيناريست غلبان كان ليا أعمال هى كذا وكذا قالتلى أؤمرنى فقلت لها أنا بس عايز أعرف أنا ليه ما حدش وجهلى دعوة عشان الحفلة بتاعت قنوات النيل بالرغم من أن فريق عمل المسلسلين كانوا هناك هل فيه موقف منى ولا حاجة".
واستطرد المؤلف: "قالتلى لا خالص إحنا بس بنعزم الناس المهمه وعلى كل حال ما تزعلش إبقي اتصل بيا وأنا أخليهم يطلعوك فى برنامج ولا حاجة ههههههههه".
واختتم عمرو حديثه قائلًا: "يبقى حد من قنوات النيل أو نهر النيل يكلمنى أحلى حاجه إنهم طلبوا منى أدى كورسات للى شغالين فى نايل كوميدي ماشي ياباشا أعتبر إن ده أول درس: ما تشتغلش فى قنوات النيل وإلا رئيستك فى العمل ها تبقي واحدة زى دى".
من جانبها علقت الاستايلست والمؤلفة الشابة إنجي علاء زوجة الفنان يوسف الشريف في ردها على ما كتبه عمرو بأنها سمعت اسمه من قبل مقدمة الحفل لأجل الصعود واستلام الجائزة، ووقتها اكتشفت عدم وجوده في القاعة، وهو ما يفيد بأن اسمه كان ضمن المكرمين، إنما لم يهتم أو ربما نسي المسؤولون عن الحفل دعوته له.