نوادر الفن والسياسة.. مارى منيب: «اسألونى أنا.. مدوِّباهم اتنين»

أول حب لها فى سن 13 سنة وأول زواج كان فوزى منيب وسنها 14 سنة
ما حكايتها مع أبو خطوة فتوة الإسكندرية؟ ولماذا رفضت عشاء الملك فاروق؟
حلقة اليوم مع أشهر حماة، الفنانة مارى منيب اللى مدوباهم اتنين لنتعرف سويا على أشهر النوادر فى حايتها ونتخيل ماذا لو حدثت فى عصرنا الحالى؟
الفنانة مارى منيب التى ذهبت وهى صغيرة مع شقيقتها (أليس) للتمثيل أمام نجيب الريحانى وكان معهما والدتهما لكنه رفض وقال: أنا مش هاشغّل نسانيس أنا مش قرادتى، لو والدتكما هاتشتغل معاكم أنا موافق، لكن والدتهما رفضت التمثيل نهائيا،
ولو تكرر هذا المشهد الآن أرى أن الريحانى كان سيوافق فالصغار الآن يصنعون المعجزات.. إحدى الصحفيات سألت مارى منيب عن رأيها فى الحب فقالت: الحب عذاب ومرار، وأرى أن كل إنسان عاقل وإنسانة عاقلة ما يحبوش، لازم الواحد يتحكم فى نفسه لأن الحب يا أخرته زواج يا أخرته تعاسة، وأنا اتقرصت منه بدرى، حبيت وعمرى 13 سنة، واتجوزت وعمرى 14 سنة جوزى الأولانى فوزى منيب لوعنى الله يرحمه بقى ويحسن إليه مرمط بىّ الأرض ست سنين، لكننى كنت بحبه ومش قادرة على بعده، ومع كده سابنى واتجوز واحدة غيرى، وفضلت بعد كده أحبه لكن خُفت من الرجالة كلهم، ودلوقت أحب ليه وعشان إيه أحب، أحب أولادى، أحب لى فرخة تسند قبلى، سلطانية شوربة تُرم بدنى، وبعدين شوفى يا بنتى أنا عايزة انصحك نصيحة: الواحدة دايما معرضة أن حد يحبها إما حقيقة وإما تمثيل وأنا فى حياتى حبونى ناس كتير أوى واتعلمت أعمل هبلة، أعمل عبيطة وأنا ست لطيفة بطبعى، ولما أشوف من حد كده احترمه زيادة شوية، فينكسف على روحه ويستحى على دمه ويبطل حركاته ده. ودى نصيحة أقدمها للفتيات الصغيرات.
الفنانة مارى منيب كانت فعلا مدوباهم اتنين فى الحقيقة زى ما قالت ليوسف فخر الدين فى فيلم (حماتى ملاك)، فهى كانت متزوجة من المخرج فوزى منيب الذى تزوج عليها مرتين من فنانتين معه فى المسرح. وزوجها الثانى كان المخرج فهمى عبد السلام أرمل شقيقتها (أليس)، وعندما أسلمت أطلقت على نفسها اسم أمنية عبد السلام نسبة له. ولو تكرر سؤال الصحفية لمارى منيب الآن فإنها لن تفضل الفراخ والشوربة على الحب وربما ترى أن الزيت والسكر أكثر انتشارا الآن.
كانت مارى منيب سيدة نشيطة تستيقظ فى الساعة السابعة صباحا، وتقوم بكل الأعمال المنزلية لأنها ست بيت شاطرة، وكانت دائما تقول (من غسل وشه بعد غداه يا فقره بعد غناه) دليل على أنه من يستيقظ متأخرا سوف يعيش فى فقر لأنه غير نشيط.
لكن فى ظل ظروف البطالة المنتشرة حاليا فإن مارى ستقول (من غسل وشه بعد غداه أكيد مفيش شغل لقاه) اسألونى أنا مدوباهم نظامين.
كانت مارى منيب تصور فى أحد الموانى، وشاهدت رجلا طويلا ومفتول العضلات له شارب كبير، وأمامه شيشة ضخمة، وعندما دخلت غرفتها ومعها ابنها فؤاد قالت له اوعى تتكلم مع حد أو تروح لحد، فقال لها أحد الممثلين ما تزعقيش ياست مارى لحسن يسمعك إنتِ مش عارفة ده مين، فقالت مين يعنى، فقال لها ده (أبو خطوة) فتوة فتوات إسكندرية، ممكن يضرب عشر رجالة ويرمى خصومه فى الهواء، فقالت له وإيه يعنى (أبو خطوة) ولا (أبو جلمبو) فسمعها (أبو خطوة) وضحك وقال لها حلوة ياست مارى ثم اكتشفت أنه من عشاق فنها.
ولو أن مارى شاهدت أبو خطوة حاليا لوجدته يقف مشهرا سلاحا آليا ويطالبها بأن تدفع له كل ما معها وإلا لن تعود من الإسكندرية.
دعا الملك فاروق مارى منيب لتناول العشاء فى القصر الملكى هى ونجيب الريحانى وفرقته بالإضافة إلى فرقة أجنبية، ولاحظ الريحانى أن مائدة الطعام الأجنبية مليئة بطعام ممتاز أفضل بكثير من مائدة طعام الريحانى وفرقته فقال: ما حدش يمد إيده على الأكل، المصريين أصحاب البلد مش الأجانب وانصرفوا دون تناول العشاء واتعشوا جميعا على حساب الريحانى. وفى اليوم التالى انزعج رجال القصر واعتذروا للريحانى وقالوا إن الخطأ غير مقصود فقال لهم: لو كانت عزومة الملك بالشكل ده يبقى طظ فى الملوك كلهم، وطلب منهم أن يبلغوا الملك بالكلام ده. لكن لوحدث ذلك الآن وخرج الريحانى ومارى منيب غاضبين سيقول قائل إنهما أعضاء فى حزب (الدستور) مع (د. محمد البرادعى) أن الرئيس يفضل الأجانب عليهم.
فى إحدى المرات قام أحد الصحفيين بإجراء حوار صحفى مع مارى منيب فسألها: اسمك إيه فأجابته: هايكون (حنفى المأزأز) اسمى مارى منيب فسألها: وزنك كام كيلو فقالت له: إيه الأسئلة الغريبة دى، كان 60 وبقى 90 كيلو، ونزل ل84 كيلو فقال لها: لو كسبت مليون جنيه تعملى إيه فقالت: يا سلام على السؤال اللى زى الشهد كنت أبنى مستشفى وأبنى ملجأ أجمع فيه كل الشحاتين واللى ما لهومش بيوت واديلك إنت ألف جنيه علشان تتجوز وتتهنى ما دام إنت فأل كويس.
أعتقد لو سألها أحد الصحافيين الآن نفس السؤال كانت ستقول: أتبرع لمستشفى سرطان الأطفال وأعالج مصابى الثورة والباقى أجيب بيه كوبونات عيش.