قواعد التدخين العشرة

مبدئياً لو كنت غير مدخن فلا أنصحك بقراءة هذا الموضوع وحقك على دماغى من فوق، وحتى تكون الأمور فى نصابها فليست كلماتى هذه دعاية للسجاير أو إستقطاباً لمدخنين جدد، وإنما فقط محض قراءة لواقع نعيشه ومحاولة لإلتماس بعض العذر لكل رفاق التبغ بأنواعه، فى زمن أصبحت فيه معظم الأعذار واهية وأغلب الكلمات يتم تصفيتها وتفريغها من عمقها، خضوعاً لتابوهات صحية وإجتماعية وربما دينية وكلها فى حقيقة الأمر مجرد هراء مغلف بعبثية غير ممنطقة.
ولن أزيد فيما يخص هذه النصائح والفتاوى والمحاولات المتخلفه من صور قذرة وتحذيرات حمقاء على علب السجائر، ولكننى سأحاول مضاعفة متعة المدخن ببعض القواعد التى يجب أخذها بعين الإعتبار عند التواصل الحميمى بين المدخن وسيجارته، مع كل الإحترام لباقى وسائل التواصل مع الدخان من شيشة وبايب وسيجار وخلافه.
1 - خد بالك وانت بتشترى علبتك إنها تكون سليمة ومنتظمة الأحرف، لأنك ممكن تاخد علبة وتكون مكرمشة أو مطبقة من أحد جوانبها بفعل النقل أو الشحن ودى حتلاقى فيها كام سيجارة بايظين والعملية مش ناقصة خصوصاً بعد زيادة سعر العلبة.
2 - لاتنظر على غلاف العلبة ولا تحاول قراءة آخر إفتكاسات الموت والسرطان وكل هذه الخزعبلات، خدها ومن غير ما تبص افتحها بهدوء واسحب الورقة المفضضة الداخلية، وإقطعها نصين وزحلق كل نص داخل السوليفان الخارجى للعلبة من الناحيتين وإرحم عينيك من القرف اللى على العلبة أو لومعاك جراب دخل جواه العلبة فوراً.
3 - يفضل أن يكون معاك كبريت لأنه أحسن من الولاعة، ولما تولع السيجارة بتطفى عود الكبريت بأول نفس تخرجه، ولعود الكبريت فوائد عدة حيث إنك ممكن تستخدمه فى تسليك سنانك بعد ما تكسر الجزء المحروق، كما إنك مش حتشد جزء من غاز الولاعة لو كنت بتستخدمها، فالكبريت أكثر فلسفة وعمقاً وأماناً وكلاسيكية.
4 - سيجارة بعد الأكل والتى ترافق كباية الشاى من أهم سجاير اليوم، لأن مزيج نكهة الشاى مع دخان السيجارة له فعل السحر فى إحساس الإتزان والشبع الذى يغشى روحك فوراً وأنت تسحب نفس السيجاره وتخرجه فى حلق كوباية الشاى وهى على بقك، خصوصاً لو كنت واكل أكلة جامدة ودسمة وحاسس بالإمتلاء.
5 - عندما تقفش دماغك فجأة وانت فى الشغل وتكون أمام عدة خيارات؛ أن تتخانق مع زميلك فى الشغل أو تزعق فى وش اللى قدامك أو مثلاً تقطع الورق اللى ع المكتب وتسب وتلعن، حتلاقى إنه من الأفضل كثيراً أن تسكت وتسحب سيجارة من علبتك وتولعها وتاخد نفس وتغمض عينك وترجع بدماغك ورا وأنت تخرج الدخان بهدوء وحكمة حتى تهدأ.
6 - لما تكون قاعد مع حد كبير وحاسس انك مزنوق فى رد على سؤال معين أو فى مقابلة هامة يترتب عليها تطورات خطيرة فى حياتك ومحتاج تفكر فى كل كلمة تقولها، أو حتى قاعد مع خطيبتك أو مراتك أو الحته بتاعتك وبتتكلموا فى بعض الأمور الحساسة ومحتاج هدنة تفكير، لن تجد أفضل من سجايرك تولع سيجارة وتتأمل النار وتتابع سحب الدخان وهى تسمو فوق الرؤوس وتراجع كلامك فى الدماغ وتخرج كلماتك مغلفة بدخان سيجارتك حتلاقى كل كلمة عبارة عن باقة من الحكمة.
7 - موضوع العزومة بالسجاير بقى محل تفكير فى الفترة الأخيرة بعد زيادة الأسعار والظروف المادية الملخبطة عادة. لذلك كن حصيفاً والمح علبة رفيقك من اللحظه الأولى لو مختلفة عن النوع بتاعك يبقى خير وبركة، انت ما بتغيرش وكل واحد حيشرب براحته من علبته، ولو نفس النوع يبقى حتعزم مرة وهو مرة، ولو انت بتشرب بمعدل أكتر يبقى بعد أول عزومة تطنش وتشرب مع نفسك وأنت تتشاغل بالحديث وعدم النظر لرفيقك وكأنك مش واخد بالك.
8 - طفاية السجاير مهمة جداً لإكتمال المنظومة، ماينفعش تطفى فى أى حاجة أو فى أى حته، رماد السيجارة وهو أمامك يكرس إحساسك بعظمة السيجارة وتضحيتها بكيانها من أجل دماغك وأنت تشاهد رفاتها أمامك فى مثواها الأخير بالطفاية الكريستال، وعندما تلفظ أنفاسها الأخيرة حاول أن تنهى حياتها برفق إحتراماً لما قدمته لك من متعة وهى تحترق وتفنى رويداً رويداً.
9 - تحتاج لحظات التواصل مع السيجارة لترتيب خاص وأجواء حلوة، يعنى ماينفعش مثلاً تكون مزنوق فى مكان ما أو ماشى فى حتة زحمة أو شايل حاجة تقيلة، وتولع سيجارة، ساعتها حاتحس بالبؤس وحتلاقى خمسين واحد أو واحده يقعد يقرفك بكلام وتأنيب من عينة الحق فى هواء نظيف وراعى الأطفال يا أخى وانت ماعندكش ذوق وبكده حتضطر تتعامل مع السيجارة بزهق وممكن تطفيها من نصها ومش حاتحس بيها، ودى إهانة للسيجارة وأريفة لمزاجك.
10 - سيجارة الهوا سيئة جداً، بمعنى انك لو فى الشارع والهواء شديد حولك يبقى مش حتشعر بجمال السيجارة لأنك مش حتشوف دخانها وهو يسبح بالجمال حواليك غير إن زهرة السيجارة حتبوظ وممكن تتناثر على هدومك، يبقى تستنى لما تقعد فى مكان وتقفل الشبابيك وتولع ياباشا سيجارتك مع فنجان القهوة وحتلاقى دى أجمل سيجارة.
وأخيراً، السيجارة تكاد تكون إحدى المتع القليلة جداً المتاحة فى هذا الزمن الذى أصبح شحيحاً بالمتعة وضنيناً باللذة. لمن شاء قدره أن يكون من المدخنين، نستميحكم عذراً يا أرباب النصائح والفتاوى، سيبونا فى حالنا، المشرحة مش ناقصة قُتلا، وماهياش ناقصاكم خالص. سيجارة يارفيق؟.