يا رب شيكا يتباع

اتكلمت من أيام وعملت مقارنة بين شيكابالا مصر وجرفينهو كوت ديفوار، ده بيلعب فى الزمالك وعنده مشكلات الدنيا، مرة بالفلوس، ومرة بالإيقاف، ومرة بالتهديد والانتقال إلى نادى الشباب السعودى، وفلوس وملايين البلطان، والتانى جرفينهو يلعب فى الأرسنال وجاى من نادى ليل الفرنسى و9 ملايين يورو، مع أنها مقارنة ظالمة بين الأندية الأوروبية والعربية بس الاتنين لعيبة أفارقة، شيكا من مصر بلد الفراعنة وحضارة 7 آلاف سنة اللى بتظهر بس عند اللزوم، وجرفينهو من كوت ديفوار بلد مليانة حروب أهلية، بس الحكاية إن شيكا بدأ غلط، فى وسط غلط، لم يجد الرعاية الكافية لا من ناد، ولا إعلام، ولا وكلاء، الكل عمال ينهش فى لحمه الكل عاوز مصلحة معينة إما يتصيت إعلاميا أو خايف من جماهير النادى، أو سمسار عاوز يلهف من وراه آلاف الجنيهات. والله حرام ما يحدث مع قيمة كبيرة لن توجد فى مصر خلال سنوات قادمة، وأتحدى لو وجدنا لاعبا ببراعة ومهارة وكفاءة هذا العبقرى. شيكابالا شئنا أم أبينا لا بد أن نعترف بأنه لاعب فذ من طراز فريد، لا يقل مهارة عن أى لاعب عالمى، لكن مشكلته الحقيقية أنه وجد كل من حوله مش خايفين عليه، خايفين على مصالحهم الشخصية، والرعب اللى بينتابهم لو شيكا اتباع. أنا عاوز أعرف مش مصر بتطالب بانفتاح اقتصادى وبندور على العملة الصعبة، طيب ما احنا عندنا شوية لعيبة والله جامدين، ممكن يدخلوا مجموعة من الملايين تفيد الدولة، وتنعش خزائن الأندية، بدل ما أنا شايف السادة المحافظين بتوع الأقاليم بيبعزقوا فى فلوس الدولة على الأندية، ومحافظاتهم تعانى من فقر علشان يسكتوا شوية جماهير. آخرهم محافظ الإسماعيلية اتبرع ب800 ألف جنيه للنادى مش عارف اتبرع من جيبه ولاّ من فلوس الدولة، طيب جبتوا رجل أعمال ليه؟ تعالوا نحسب شوية صفقات ممكن تكون لها وضع خاص لإعادة الثقة فى اللاعب المصرى فى عالم الاحتراف الخارجى، أحمد فتحى، شيكابالا، محمد صلاح، أحمد الشناوى، محمد الننى، أحمد حجازى، مش كل دول مطلوبين بره، ولا الإخوة السماسرة بيضحكوا علينا واحنا بنصدقهم بكل سذاجة؟ نفسى أفهم أو أى حد يفهمنى الفاكسات ديه بتيجى منين، والله الدولة الوحيدة فى العالم اللى الفاكس لسه شغال فيها، ويوميا إما بلعيبة إفريقيين كسر أو عروض من أندية وهمية. عموما أتمنى من كل قلبى أن شيكا يتباع ونشوفه فى توتنهام، علشان نشوف إذا كان السمسار بتاعه كذاب ولا النادى هو اللى واقف حاله، ولاّ اللاعب هو نفسه لا يفضل الاحتراف، ولا احنا سمعنا غلط، بس حد يطلع يقولنا الصراحة بلاش شغل الإعلام المسكن، كلهم خايفين من بعضهم ولّا بيجاملوا بعض ولاّ مش عاوزين يخسروا الضيف علشان يضمن النجاح. أخيرا دعوة مفترجة يارب بحق الأيام المفترجة أشوفك يا شيكا انت وفتحى أول المحترفين وبتلعبوا فى أكبر وأحلى وأجمل وأغنى وأقوى دورى فى العالم قولو معايا يااااااااااارب.