كوسة وصندوق ومواطن

من ينتخب المسؤولين الفاسدين هم المواطنون الصالحون الذين لا يدلون بأصواتهم. جورج جان ناثان. بعد ساعات قليلة ستشهد مصر اهم انتخابات برلمانية,من عادتى بشارك فى الانتخابات ولكن هذه الانتخابات هقاطع كنوع من التغيير ,وعلشان لما قرار المقاطعة يثبت فشله ادعى على اللى كان السبب, الواقع بيقول ان الحرية لا تمنح لكنها تنتزع ,وفكرة التغيير باسلوب المقاطعه ده ممكن جدا يجيب نتيجه بس مش قبل خمسين سنه
نفسى اعرف من الذى افتى بأن الثورة تغيير عنيف وان المشاركة خيانة والمقاطعة وطنية , ديه ثورة شعبية وليست حريق للمحافظة,الثورة ممكن تكون سلمية والمظاهرة ممكن تكون دون عنف,والمشاركة ممكن تكون بناءه وكل شىء ممكن نغير فى الياته بما يتناسب مع مقتضيات العصر وطبيعة الشعب ,لكن مقاطعه من شعب مقاطع كل حاجة تفرق فى ايه ,انا لو مكان النظام اقول بركه يا جامع اهى جت منهم ما هو اللى بيشاركوا على طول مننا وعلينا لكن القلة المندسة اللى بتنادى بالتغيير لو نزلت ممكن تقلب عاليها واطيها ,عموما لو الشعب نزل وشارك فى كل حاجة ووقف يطالب بحقه انتهت الحكاية ,هو النظام منين من سيبيريا ,ابدا بعيدا عن رؤوس الفساد الكبيره اللى لو كنا ايجابين مكنوش هما بقوا هما , الباقيين مواطنين عاديين منهم الصالح ومنهم الطالح ومشكلتهم انهم مثلنا جميعا متضايقين ومقاطعين وعبد المأمور والمأمور يتغير مهما يتغير فى الاخر احنا شعب مأمور , مقاطعين السياسة والتعبير عن الرأى بحرية وكلها مقاطعة ومبتفرقش ,ونفكر فيها مع بعض, الصندوق فى اللجنه واللجنه محدش هيصوت فيها غير حزب وطنى يا حزب وطنى ,وطبعا اللى مرحش هيتحط بدل صوته كوساية والغالبيه مبتروحش يبقى الصندوق هيتملى كوسة على اخر اليوم تتطبخ وناكلها احنا بالهنا والشفا ومطرح ما يسرى يمرى, وكله بالقانون طيب فيه فكره اننا نقاطع بايجابية و نصور التجاوزات داخل اللجان ,يا سلام اوى اوى اى خدمة نصور منصورش ليه ,للى ميعرفش بعرفه ان النظام منع التصوير ,يعنى خلاص مفيش تصاوير تكشفهم كلها هتبقى تصاوير من لجان نظامها ولا نظام دايرة سياتل واشنطن, وطبعا لا فيه مراقب دولى يراقب وحتى المراقب المحلى بقى متابع دون ادنى صلاحيات كان الحل الوحيد للمعضلة مشاركتنا بكثافة وحماية اصواتنا وفضح التزوير لكن هذا الحل اصبح من المستحيلات تماما زى العنقاء القائد الوفى فى بلدنا واصلا هنكشف ايه ونصور ايه واللى هيصوتوا حزب وطنى والباقيين مقاطعين اهدوا النظام عن كل صوت كوسايه كتر خيرهم ,بالنسبة للاخوان فمعاهم ربنا لان النظام هيوريهم انتخابات سوده وطبعا كان مفترض نقف جنبهم لكننا مع الاسف خارج نطاق الخدمة احنا فى السوق بنشترى الكوسة علشان الصندوق والصندوق جوه اللجنه واللجنه مستنيه كوسة المواطن المقاطع الواطن داخل فكره لن تجدى يوما وصوتى يللى منتيش غرمانة .