اوعى وشك

حزب وطنى اوعى وشك حكومه اوعى وشك نيولوك من اجلك انت اوعى وشك افاك ده ولا وشك
الحزب الوطنى طلعلنا بشعار من اجلك انت الواحد مننا يقعد يشحذ زناد فكره ويعصر دماغه علشان يفهم يعنى ايه من اجلك انت ميفهمش هل يا ترى من اجل المواطن الصدمان العدمان اللى طالع عينه ل 20 سنه قدام ببركات سياساتهم الرشيده جدا اللى علمت المواطن بدل ما يرشد استهلاكه يشترى دماغه وميستهلكش اى حاجه ويا ريته عاجب الا الواد عز طلع يقول ان الزبالة الكتير دليل على رفاهيه المصريين عزيزى المواطن اوعى تزعل منى انا بعيد كلامهم بس ماليش دعوة مش انا اللى قلت هما اللى قالولوه الحكومه نظيفة اليد اوى نظيفة الموظفين جدا رئيسها نظيف اخر تلات اربع حاجات بيقول انه بيشتغل 18 ساعة فى اليوم علشان عجلة التنميه تلف وفعلا انا شايفاها بقالها مده بتلف بسرعه لدرجة انها طلعت فساتين قمصان يلا يا مواطن يا صدمان بوس ايدك وش وضهر العجله فى مصر اتوماتيك حكومة الكترونيه مش اى حد يعنى وعجلة تنميتها بتلف ومكنتها شغاله و بتقولك من اجلك انت خربناها وقعدنا على تلها علشان تطأ تموت وترتاح من الدنيا وبلاويها اوعى وشك بقى هنتكلم عن السيد جمال مبارك اللى الشعار احتمال كبير يكون المعنى الحقيقى ليه فى زور المؤلف من اجلك انت يا ابو فريده ومن اجلك عيونك فصلنا مواد فى دستور ومن اجلك انت ضللنا المواطن وفهمناه انك وحدك من تصلح للحكم على اعتبار ان الست الوالده هى الوحيده اللى بتعرف تخلف وبقية سيدات مصر جالهم عقم رباعى الابعاد وقالولنا انك متربى على الرئاسة وشبعان ومش هتسرق هنفرض صدق التهيؤات ديه مبدئيا البنى ادم عموما مبيشبعش فطرته كده الا بنى ادميين قليلين اوى ربنا كرمهم بالرضا والايمان الحقيقى ومعتقدتش انك منهم كان بان عليك وكنت سيبتنا فى حالنا واكتفيت بالعز اللى عشت فيه طول عمرك من دم الغلابه النقطه التانيه حكاية بيت الرئاسه ديه مش عمليه بالمره اصل مش منطق ولو منطق خلاص منقولش جمهورية خليها ملكيه ده منطق الملكيه ولوانت مقتنع بالمنطق ده مكنش السيد الوالد بقى حاكم حتى لو شاف طبلة ودنه الداخليه كان هيبقى الملك احمد فؤاد هو الحاكم وكنا اترحمنا من طلعتكوا البهيه فى ذكرى 23 يوليو ومسمعناش اخترناه وبايعناه واحنا معاه لحد ما يتكل على الله النقطه التالته ان مصر مليانه رجال شرفاء لديهم من المؤهلات اللى يخليهم يحكموا مصر ودولتين كمان نيجى بقى لمربط الفرس انك من الشعب طيب ادينى عقلك بامارة ايه انت من الشعب دا انا بعنيه بشوف الشارع بيفضوه من المواطنين والعربيات علشان تعدى تبقى مننا عايش فى قصر رئاسه من عقود ومننا انت لا عمرك عشت معانا ولا كنت مننا فوق بقى هو انت عمر مواطن شافك من غير حراسات دا السيد الوالد وحضرتك بتكلفونا كل دخل قناة السويس لحراسات سيادتكوا وتقول مننا يا راجل قول كلام غير ده وافتكر الكداب بيروح النار ويخاصموه كل الشطار اخر من اجلك انت اعتقد هتكون من نصيب الاربعين عكروت ملاك مصر ودول بلاويهم بقت بالجبال ولو اى مواطن شريف حكم مصر الف باء حكم هياخدهم هيله بيله على سجن طره والهنا والحمايه والحصانه اللى هما فيها محتاجين الوضع يبقى على ما هو عليه والمتضرر اللى هو احنا اللجوء لبرج القاهرة الهوى هناك بحرى شرقى وطبعا مفيش اضمن من السيد جمال عندهم وزى ما كلنا شايفين السلطه اتجوزت الاعمال وجابولنا نصابين وحراميه حلوين ليشيدوا جمهورية الفساد العظمى برعاية الحزب الوطنى الحزب الوطنى من اجلك انت واوعى وشك يا مواطن