بالصورة : باسم مرسي يوضح لماذا اشتبك مع مشجعي الأهلي في تونس

تحدث باسم مرسي مهاجم فريق الزمالك الأول لكرة القدم، عن الأزمة التي نشبت بينه وبين جماهير الأهلي ودخوله في مشادة مع عدد من مشجعي الأحمر في تونس نتيجة سبهم للأبيض.
وقال باسم عبر حسابه الشخصي بموقع التواصل الاجتماعي "انستجرام": «توضيح لمشكلة امبارح اللي كل واحد طالع عمال يحلل ويقول كلام على مزاجه، أنا من أول ما لعبت في نادي الزمالك وأنا بتشتم بوالدي ووالدتي وبيتقال عليا كل حاجة ممكن تتقال تنك مغرور ده عايشها على الناس بيزعق وبيتنرفز على اللاعيبة بيشتم زمايله في الفريق عايز كل كورة تتباصى ليه عايز هو بس اللي يجيب جول ده بيروح للحلاق أكتر مابيدخل الحمام كل حاجة بعملها شاغلة الناس أجيب جول ده بقى تنك ومغرور مجبش جول ده مستواه بقى وحش ومبقاش زي الأول أطول شعري مش عاجب أقصره مش عاجب كل يوم اتصور مع الناس ومش عاجب ويوم ماكون تعبان من التمرين ومش قادر اتصور علشان بيبقى ورايا التزامات تانية ابقى تنك ومغرور ده أنا بقيت أخاف أقول لحد سلام عليكم ليقولك باسم اتجنن ماشي يقول للناس سلام عليكم".
وتابع: "عارف إني مش هعرف أرضي كل الناس علشان لو رضيت كل الناس هبقى منافق كل ده ولا أثر ولا هيأثر فيا علشان أنا عارف طريقي كويس وعمري ماعملت ولا هعمل مشكلة بسبب التفاهات دي، وعارف إن ضريبة إني بلعب تحت اسم كيان وجمهور كبير هو نادي الزمالك اللي علشانه بجد ممكن أعمل أي حاجة".
وأضاف: "إنما توصل إن النادي اللي بلعب وبموت نفسي علشاه يتهان واسمعها بوداني أكتر من مرة ومردش وأجيب حقه من اللي غلط فيه ابقى مش راجل اللي عايز يغلط فيها براحته مش هرد عليه بس نادي الزمالك خط أحمر ولما بنقول ربك وطنك ثم الزمالك دي مش كلمة ولا شعار بنقولوا وخلاص ده شعوره حسينه ومصدقينه بجد".