أخبار الأهلي : وائل جمعة يحرج متعب وعاشور وغالي

أخبار الأهلي : وائل جمعه في عز نجوميته وتألقه دخل في مشكله مع مانويل جوزيه وبناءا عليها طلب جوزيه من الاداره ان وائل يمشي ويقدم وقتها مجلس الاداره عرض اعاره لجمعه في السيليه القطري وهما معتقدين ان جمعه هيرفض علي اعتبار ان الاعاره اهانه لاسمه وتاريخه او انه هيضغط حتي يتم بيعه نهائيا او يهدد بورقه الزمالك لكن جمعه اللي كان احسن مدافع في مصر و أفريقيا فالوقت ده يفاجئ الجميع بموافقته على قرار الاعاره من غير حتى ما يصرح او يعلن عن وجود مشكله بينه وبين الخواجه ويرجع بعدها جمعه بعد ما هديت الازمه مع جوزيه ويستمر فالاهلي لحد لحظه اعتزاله.
أخبار الأهلي : وائل جمعة وموقف تاريخي في عهد جوزيه
أخبار الأهلي : وائل جمعه بعد التاريخ اللي عمله والاسم والعطاء الكبير للنادي متعملوش مهرجان اعتزال واكتفي بمؤتمر صحفي نزلت فيه دموعه وهو بيودع جماهير ناديه وخرج في هدوء وخرج عظيم وكبير وراجل زي ما اتعودنا منه علي مدار السنين بعد الاعتزال تم تعيينه مدير للكوره وبعدها يدخل في أزمه مع حسام غالي كابتن الفريق وينتصر مجلس الإداره لغالي على حساب مدير الكوره ويتم اقاله جمعه ويخرج في صمت من غير اي تصفيه حسابات ولا هجوم ولا انتقاد لاي شخص احتراما للجماهير وللنادي اللي عملوا اسمه.
أخبار الأهلي : وائل جمعه عمره ما استغل اسمه ومكانته في انه يصفي حساباته مع أي حد فالنادي ولا عمره اتكلم عن أي مشكله فالنادي بشكل سلبي دايما هتلاحظ حرقته وانتمائه وحبه للنادي في تحليله للمباريات وقت الخساره وهتلاحظ سعادته وفرحته قد ايه وقت الفرحه.. دايما عارف دوره وواجبه تجاه ناديه ومع كل موقف بنشوف مشجع اهلاوي مش محلل حيادي.
أخبار الأهلي : رسالة لمتعب وعاشور وغالي
أخبار الأهلي : يا حسام يا غالي ويا عماد يا متعب يا ولاد النادي مفيش نجم كبير مسئول يطلع ينصف زميله على حساب النادي ومتعودناش ان عندنا اي حد يطلع يناقش اي أمور سلبيه على السوشال ميديا عندنا اللي بيعوز يعترض على حاجه مش بيطلع يصدرها للجمهور ويلبس الكل في بعض عشان ينتصر لقناعاته الشخصيه او يحس بالانتقام لموقف حصل معاه مكان حل اي مشكله او اعطاء اي وجهه نظر مكان معروف وميتوهش مكان عيشتوا فيه أكتر ما عيشتوا في بيوتكم اللي من فلوسه ومن خيره ، ( نادي الاهلي فرع الجزيره ) ، النادي الأهلي خيره علي الكل وهو اللي عمل اسم اي نجم واداه قد اللي أخده منه مليون مره يا نجوم يا كبار.