حمدي نصر يكتب : مسجات(4) إلى

* جماهير الأهلي والزمالك والإسماعيلي:

- رجوتكم عدة مرات ألا تكونوا أعزكم الله مثل "الدبة التي قتلت فريقها".. كويس كده أن فرقكم تلعب ناقصة أهم لاعب؟!!..

وميقدرش يقعد حتى على مقاعد البدلاء.. على رأي فؤاد المهندس الله يرحمه ( بلاها شوشو.. بلاها زوزو) يعني الفرحة مابتكتملش إلا بالشماريخ والليزر.. .. ياجماعة.. العناد بيورث الكفر.. واحنا بنلعب كوره في النهاية .. خلونا نسعد بوجودكم خلف فرقكم.. الخسارة ياجماعة الخير مضاعفة.. خسارة لاعب مهم وخسارة فلوس.. إنها مسؤولية الألتراس الأهلاوي والإسماعيلاوي والوايت نايتس.. فرقكم في حاجة لكم.. وهل في هذا الوقت يتخلى الحبيب عن حبيبه..وهل قرأتم ما قاله رئيس أحد أنديتكم: "بعد عقوبات المسابقات نصرف منين"؟!!

* بيبو

- بقى مش عارف سر هجوم يونس على الأهلي ورموزه الحاليين؟!!: ماهو قالها مرة عاالهواء مباشرة إنه مستعد يشتغل بدل أوسكار.. ومحدش سأل فيه!!.

* أبوتريكة:

- أنت فعلاً نموذجاً يُحتذى.. بارك الله لك في صحتك ومالك وعيالك.. تضحي بخمسة ملايين دولار عشان الأهلي.. نعم الولاء والوفاء وعقبال ما يتعلم الآخرون.

* قناة الأهلي

- قال أحد النقاد الرياضيين "إن قناة الأهلي ستتحول إلى كباريهات نص الليل على طريقة (خالته أم بطه)".. اعتبروا ان ده جرس إنذار وادرسوا الأمربجدية ولا داعي للتعالي والعناد وركوب الراس.

* محمود معروف

- محمووووووووووووود.. أسخنلك المسج يا حبيبي..في مقابلة مع الكابتن مدحت شلبي عرضتم كليب لكلب يلتقط الكرة وقلت: "ياريت تجيبوه مصر لأن فيه نادي محتاج حارس مرمى".. الأهلي والزمالك محتاجين حارس مرمى بتقصد مين بالظبط؟.. عيب يا محموووووووووووود.. انت حريص ان كل الناس تكرهك ياحوده.. انت كده تبقى مش حبيبي يامحموووووووود؟!!!!. اختشي شويه والا اللي اختشوا ماتو؟!! ربنا يحسن أخرتنا يامحمووووود.

* الكابتن حسن شحاته:

- كنت أعلق عليك أمل كبير في عقلانية وهدوء واتزان تصريحات المدربين.. الفترة الأخيرة يبدو إنه فاض بيك الكيل.. وعلى رأي واحد مش صاحبنا.. انت لسه شفت حاجة.!!

* رجال الزمالك لكرة اليد..

- فزتم على الأهلي في بطولة إفريقيا.. مبروك.. انتوا أثبتوا إن الفوز مش بالصوت الجعجاع.. وإنما بالعزيمة والعرق.. والدراع.

* رجال الأهلي لكرة اليد:

- عزاءكم الوحيد بعد الخروج من بطولة إفريقيا أن يفوز بها الزمالك حتى تكونوا قد خرجتم على يد البطل ودا مش عيب. وخيرها في غيرها.

* إلى حملة الإعدادية والابتدائية القديمة وراسبي الدبلومات:

- موقع رياضي يطلب محررين رياضيين من حملة المؤهلات أعلاه: فقط .. المميزات: غير مطالبين بحضور المباريات.. الخبرات: يجيدون النقل من الجرايد و المجلات بدون غلطات..وسيتم فتح باب قبول الطلبات بعد خمس سنوات.

* الكابتن خالد الغندور:

- بذكاء غيرت أسلوبك مع الأهلي وبديت تضرب وتلقى ودي ميزة مش موجوده عند غيرك.. سامحني على الدعابة اللى جاية.. دي.. زمان قالوا" كل قصير مكير" وده ذكاء مش مكر.. وتحياتي لك.

* الكابتن فاروق جعفر:

- في مباراة التليفونات كنت خارج نطاق الخدمة.؟!! واللا اللعيبة مكنوش بيلعبوا بحرارة؟!!.

* الكابتن محمود بكر:

- لطعة عبد الله السعيد لزقت على عين محرر رياضي فكان الوحيد في العالم اللي شاف إن الأهلي فاز على الاتحاد السكندري(2-1).

* حلف الهاتو( بين الأهلي والاتحاد السكندري)

- من أول مباراة انقسمتوا والجماهير كل واحد مسك في خناق اخواتوا... حي حي.. بركاتك يااللي عليك القصد والنية.. أشتاتا أشتاتا.. ربنا يبعد عنا عقوبات لوايح اتحاد الكرة وتشريعاتو..حيييييييييي.