رسائل مفخخة إلى جوزيه والصقر ولاعبى الأهلى

- محمد فضل : يا سيدى ما كنت تكتب فى عقدك انك مالكش فى مباريات انبى بالذات وما تلعبهاش – كفاية ضيعت دورى مع انبى برضه قبل كدا – كان لازم تضيع الكاس كمان !!
- رامى ربيعة : ياريت تبطل تركيز فى موضوع المنافسة على لقب الهداف مع شريف عبدالفضيل .
- شريف إكرامى : يا ترى وعد جوزيه ليك بلعب مباريات الكاس عن حب ولا حاجة تانية .
- وائل جمعة : ما تريحلك جمعة ولا جمعتين كدا يا راجل ولو طولت موسم براحتك عذرينك برضه .
- محمد نجيب : ماتزعلش يا عم ان كان الالتراس شبك مع الشرطة عادى هنصالحهم على بعض بس ابوس ايدك انت بتلعب فى الاهلى دلوقتى مش لسه فى الشرطة بطل نظام المخبرين بتاع البالطو والكوفية دا مع المهاجمين .
- أحمد شديد : المفروض الاهلى يلعب بيك ووليد سليمان فوق ال 10 لعيبة وتكملوا ال 11
- أحمد فتحى : يا سيدى إعتبر نفسك بتلعب فى انجلترا واحنا هنخليلك الجمهور يركب شعر اصفر وعدسات خضرا وهنخللى زمايلك ينادوك ويقولولك فاتهى ..فاتهى .
- حسام عاشور : بصراحة تستاهل جايزة دا انت حطمت الرقم القياسى فى عمل الخمسات بدون عربية فى الملعب !! انت ما بتدوخش من كتر اللف حولين نفسك يا راجل دا احنا دوخنالك.
- حسام غالى : يا عم بطل لعب القنزحة دا والعب وكل النجيلة ولا نسيت ايام توتنهام بعد ما رميت الفانلة اتعمل فيك ايه انت محسسنى انك نازل ببالطو ابيض وجوانتى ومتعقم وسكرتارية على الخط ، اعتبر نفسك جاى من بيلا تختبر لسه فى الاهلى .
- جدو : سنك كبر قوى يا حاج على الجرى ورا الكورة طول الماتش ابقى استناها جنب الكورنر هى بتعدى كل نص ساعة من هناك .
- جونيور : ايه يا سيدى انت برازيلى برازيلى ولا برازيلى تشيك !! باين فى برازيل تانية منعرفهاش جوزيه بيجيب منها اللعيبة
- أحمد السيد : ياريت ما تستغلش الظروف وتلعب دلوقتى لو بتحب الاهلى يا شيخ بلاش اعمل نفسك عيان ولا حاجة ارجووك .
- الألتراس : ما ينفعش تحارب حبيبك وتخليه عدوك ، حتى لو حبيبك استندل معاك كفاية عدو واحد ليه تستعدى حبيبك كمان ، وبعدين يا سيدى ماله بييييب بيييب اهلى عادى يعنى هنلعب ونكسب ، وربنا معاكم ويطلع اخواتنا من ضيقتهم .
- الحكم محمد فاروق : انت لحد امتى هتفضل عايش فى شبح وكابوس ضربة جزاء تريكة مع الحرس روح عالج نفسك يا سيدى
- أحمد حسن : مش عارف ليه افتكرت احلى افيه بعد الثورة بتاع ارجع ياريس احنا كنا بنهزر !!
- الحضرى : احنا مش عاوزينك بس لو سمحت ممكن نسنتسخ منك 2 بس معلش علشان العيش والملح الله يكرمك !!
- جوزيه : بعد المباراة قولت المستقبل المستقبل للأهلى لا حول ولا قوة الا بالله فكرتنى بالابيض قادم هاها انت يا عم مالك سرحت معاك ولا ايه مستقبل ايه ونيلة ايه وانت مسرح اللعيبة الشباب ومخليهم كعب داير فى اندية مصر دا انت مرمطهم يا راجل ، ولا هتكون هتعمل المستقبل بالفرقة اللى معاك تبقى مصيبة سودة ، الله يكرمك يا با الحاج استهدى بالله كدا واشرب عرقسوس ساقع وامشى مع الشوية الأرزقية اللى انت جايبهم معاك كفاية كدا عملوهم واتظبطوا يروحوا البرتغال يعملوا مشروع توك توك هيبقى زى الفل وانت برضه هتبقى ملك ياسيدى بس ملك التوك توك .
- الأعزاء قارئى المقال : عذراً على لغة المقال ولكن الصدمة إنعكست علىّ بكوميديا سوداء ، وأعتقد كلكم تشاركونى الرأى بأن الفريق يمر بمحنة غير مسبوقة من خسارة البطولات المصحوبة بعدم بذل المجهود المضاعف من اللاعبين كالعادة ، أى هزيمة مصحوبة بأداء سيىء !! نرجوا من الله أن تُظهر لجنة الكرة العين الحمراء لمدربها المدلل حتى يعرف أنه ليس فوق النقد بل والتوبيخ الشديد والتحذير والإنذار بالإقالة ، مثله مثل أى مدرب فى العالم يُقال ، فهو ليس أكبر من مورينهو الأصلى تشيلسى أقاله ، ولا من كلويفرت برشلونة أقاله ، ولا من كابيللو أقاله الريال ، بالرغم من أن كل واحد من هؤلاء أحرز بطولات لا تعد ولا تحصى لناديه وكان معشوق جماهيره ، ونرجوا من الله التوفيق .