هجمة مرتدة

■ مانويل جوزيه.. انا عارف انك جيت مصر عشان تعمل اعلان وتدور على شوية فلوس، بس مش شايف انه عيب تتواجد فى مصر مع كل فترة بيمر فيها الأهلى بظروف صعبة، مش شايف ان ده قلة احترام وضغط على مدرب بيشتغل فى النادى حاليا، مش شايف ان تضيع وقت انى اكتب لك الكلام ده وانا عارف انك مش بتتكلم عربى .
■ حسن حمدي.. كان نفسى تقوم تقابل طاهر ابوزيد فى المقصورة بمصافحة وابتسامة وحب حتى ولومش من قلبك، صورة الأهلى امام الجميع أهم من أى خلاف شخصي، صورة الأهلى يا رئيس النادى الأهلي.
■ عمروجمال .. انت لاعب موهوب وامامك الكثير لتقدمه للأهلى ومنتخب مصر فى المستقبل بإذن الله، حاول بس تتعلم من أخطاء غيرك ولا تقع فريسة للغرور، وربنا يبعد عنك الحسد، كويس ان الحسد ضرب دبلة خطوبتك وضاعت، احسن ما يضربك فى الصليبى والعياذ بالله .
■ شيكابالا .. كنت هتموت وتروح لشبونة وعملنا فيلم ومسلسل انك اتنقلت للبرتغال قبل 12 ثانية من قفل باب القيد، كل ده عشان تلعب مع الفريق الاحتياطى هناك، ياعم اهتم شوية بمستواك انت عندك احسن من كده بكتير .
■ محمد الننى .. لعبت فى اسرائيل مع صلاح والدنيا كلها كانت بتتكلم فى الموضوع ده، لكن لما روحت تل ابيب لوحدك محدش اهتم يذكر المباراة، صدقنى العيب مش فى صلاح، حاول تشوف المشكلة عندك فى ايه عشان تكون نجم، لأن مستواك مع بازل لم يقنع الكثيرين حتى الآن .
■ ألتراس أهلاوى .. أعظم جمهور كورة فى المدرجات، بس لو قياداتكم تنضف الجروب من المسيئين لصورتكم، ستقوم وقتها ثورة لتتواجدوا فى كل المباريات.
نشر بعدد 689 بتاريخ 24/2/2014