من أهالى رملة بولاق إلى رئيس الجمهورية: «تقبل على زوجتك وأولادك ياكلوا من الزبالة»

البسطاء والغلابة ساكنو العشوائيات فى منطقة رملة بولاق يفضحون مرسى ومشروع النهضة الوهمى «فوزية على أحمد» تبلغ من العمر 70 عاما لديها 6 أبناء يقيمون معها فى منزل واحد البنت فقط هى التى تعمل فى النظافة وتأخرت فى الزواج بسبب الظروف الاقتصادية الحالية دخلها 300 جنيه فى الشهر تقول:
زمان كانوا بيتصرفوا حتى لو ياكلوا كل يوم بطاطاس لكن حتى البطاطس بقيت غالية علينا وأصبح الكيلو ب3 جنيهات أكفى ولادى بأى طريقة وأنا ست على باب الله أنا كل ما بيعدى اليوم بحمد ربنا أنه يوم من الايام اللى عايشنها خلص الكل حالته «زفت» وابنى الكبير عنده القلب ومش لاقيين نعالجه احنا بالعافية بندبر العيشة بالمرار احنا حتى الفراخ ميش بندوقها غير كل فين وفين احنا دلوقتى ندمنا على أيام مبارك بسبب بتوع الدين.
رشيدة أحمد أرملة لديها سبعة أولاد معاشها 400 جنيه تقول: بتدفع إيجار 300 جنيه وأملك كشك بقالة اللى يدوب بيكفى ثمن البضاعة بالعافية مفيش حتى حد مسئول يحكم بالعدل.
«عدلية أحمد محمد حسين» أكدت أنها مطلقة ولديها ابن واحد متزوج وزوجته تركته بسبب الظروف وابنها ايضا تركها تعيش لوحدها لكنى أعذره لان لديه أطفالاً يريدون العيش والحياة وتقول هيعمل ايه ودلوقتى شغلتى اللى بتعيشنى هيا الشحن على الهواء بيطلعلى 3 جنيه فى اليوم يدوب يكفونى بالعافية بس هنعمل ايه ادينا عايشين انا عندى عملية مياه على عينى مش عارفة اطلع قرار.
«حامد محمد» من المنوفية ويقيم ويعمل برملة بولاق متجوز ولديه بنتين يقول: بحضر للقاهرة علشان اشتغل فى بترينة لبيع الكفتة وكان الاول الشغل كويس وكنت بنزل فى اليوم 60 كيلو لحمة لكن دلوقتى بسبب ظروف البلد والناس معهاش فلوس والحالة ضنك بقيت انزل فى اليوم 5 كيلو وتمن الرغيف 3 جنيه يعنى مش مبلغ ولكن محدش بيشترى، اما السيدة «سكر عباد حمودة» تعمل «سايسة عربيات» وعندها 45 سنة تقول: زوجى متوفى وعندى 3 أولاد ولايوجد مشروع نهضة ولا حاجة ده كله كلام.
أما أم محمد تقيم بمنزل صغير هى وابنها وزوجته وبناتها وأخو زوجها وزوجته فأكدت أنهم يتحركون بصعوبة فى المنزل لكثرة عددهم واننا نكفى ولادنا بصعوبة لم نأكل اللحمة ولا الفراخ منذ فترة كبيرة، العيشة بقيت مرار غير البلطجة ومفيش حكومة كلنا بنخاف حتى نعمل محضر لأى شخص وبنقعد 3 أيام من غير مياه والمسئولين عايزين يطردونا من البيوت ويستولوا عليها كل فترة يأتون ويهجمون علينا ويضربونا والضابط دخل البيت وفتح الاوضة على مرات ابنى وقالت له أنا حامل قال لها أنا ممكن اسقطك وأخذونى وابنى وطلب مننا نشتغل مرشدين ليهم فى المنطقة وكله بسبب الاخوان ما يفتكروناش غير أيام الانتخابات فهل يقبل مرسى هذا على زوجته وأولاده احنا مدفونين بالحيا. ويقبل على أسرته الناس تأكل من الزبالة.
أما طاهر محمود صاحب محل فراخ فيؤكد انه قبل حكم الاخوان كان الحال افضل ويبيع فى اليوم اكثر من 7 أقفاص فراخ لكن الآن لا يبيع قفص واحد فكل أهل المنطقة لا يشترون الا الاجزاء والهياكل بسبب ظروفهم الصعبة فالاخوان هم من تسببوا وقطعوا عيشنا منهم لله
نشر بتاريخ 1/4/2013 العدد 642