«مادو»: ذنبي هو حبي لوطني

طالب الفنان الشاب «محمد عبدالعال» والشهير ب«مادو» من جمهوره دعمه ومساندته، معربًا عن خوفه من الساعات المقبلة خاصةً بعد أن علم بقرار الضبط والإحضار الصادر بشأنه بسبب أغنيته الأخيرة تراب الاوطان.
وأعرب «مادو» عن خوفه الشديد على زوجته لذلك طلب من جمهوره أن يساندها في حال أن يتم القبض عليه.
وكتب «مادو» عبر حسابه الرسمي قائلًا: «صباح الخير شوية فضفضة صباحية طويلة شوية ولو عايزين تساعدوني وتحموني بعدها ياريت تعملوا شير للموضوع وشكرا:
في هنا ناس كتير المفروض انهم متابعين ليا وهما ضهري فالحياة.. معرفش مين متابعني من امتي.. بس اعتقد الي متابعني من 2007 عارف كويس انا بحب بلدي قد ايه.. وغنيت وقولت الحق فكل العصور ضد كل ظالم حتي لو بشوية اغاني ساخرة !!
المهم امبارح اتبلغت.. ان صدر امر بضبط واحضار ليا هيوصلني بشكل رسمي خلال ساعات.. والسبب: اخر أغنية نزلتها (( تراب الاوطان )).. وبعديها (( الشعب اتجنن )) والاغنيتين طبعا اتكلموا عن الجزر المصرية ورفضي التام لبيعهم للسعودية.......... اه والله زي ما بقولكم اغنيتين رجوا كيان البلد !!!!!!
المهم انا اه اتجوزت من شهرين.. واه بقيت مضطر اخاف علي نفسي علشان مراتي.. وبقيت بلجأ للحلول السريعة والصلح ف اي مشكلة علشان احافظ علي امان حبيبتي وهدوئها.. بس ده مش معناه اني اشوف الظلم واسكت.. ابقي معنديش كرامة.. اشوف بلدي بتتباع ومقولش لا.. اني لما وطني يحتاجني انزل احافظ عليه منزلش.. انا والي زي بنحب البلد اكتر من حكامها واعضاء مجلس شعبها وحكومتها... احنا بنحبها وبندفع تمن حبنا ماديا ومعنويا ونفسيا !! مبنقبضش الوفات وملايين علي ده........
والخلاصة انا مستعد نفسيا جدا لمواجهة اي تحقيق رسمي لاني مغلطش ومش هعتذر لاني صح وقولت الحق..... وهواجه اي ظرف علشان ربنا معايا.. ورزقني ب زوجة تصوني.. ورزقني حبكوا فضهري.. مع ان ده كله ظلم فظلم بس دي بلدنا وفالاخر اني مش هاجي حاجة جنب الي اعتقلوا واتظلموا واتسحلوا فالبلد السنين الي فاتت ولا الي اتصابوا فالثورة ولا الي ماتوا علي الحدود ولا الي طفشوا من كتر الاذي النفسي والجسدي الي اتعرضوله........ بس الي يصعب عليا اوي ان ذنبي هو حبي لوطني ورفضي لبيعه او ايجاره !!!!
رضيت قبل كدة بالتضيق عليا اعلاميا ومبقيتش اعرف اطلع ف اي برنامج بسبب اغانيا الا نادرا زي فقط bbc وontv تقريبا بس !
الخلاصة: انا مش برئ لو خوفي علي تراب بلدي بقي جريمة.....
واخيرا من قلبي
حسبي الله ونعم الوكيل فالاهالي وفكل الناس الي معندهمش نخوة ولا كرامة ولا بيحسوا بظلم الجيل بتاعنا من كل الاتجاهات علشان هما الي صنعوا العهر الي احنا عايشين فيه
شكرا لدعمكم لي و:
محمد عبدالعال او مادو
مغني فريق تاكسي
والبوست ده كله هدفه تعبير لمراتي عن حبي ونفس الوقت بعرفها اني لو حصلي حاجة في ناس كتير بيحبوني هيكونوا ف ضهرها.. صباحكم سكر زيادة».