آلاء جاويش: «الأمومة مش سهلة بس مستاهلة»

على مدار سنوات طوال تألقت آلاء جاويش كمراسلة تليفزيونية وواحدة من نجمات راديو «شعبى إف أم»، ولأنها تنتظر حاليًا أول حدث سعيد فى حياتها الزوجية منذ زواجها من 3 سنوات، تحدثنا إلى آلاء لنعرف منها تفاصيل يوميات المذيعة الحامل وخططها لمرحلة ما بعد الوضع فقالت:
تجربة الحمل بصراحة كانت بالنسبة لى صعبة من أول زواجى لأننى حملت 3 مرات لكن ربنا لم يرد استكمالها، لذلك دايمًا عندى تخوف من التجربة دى رغم لهفتى الكبيرة عليها وخوفى الأكبر كان بسبب عدم وجود أمى بجابنى لأنها توفيت قبل زفافى ب 3 أشهر، ومن وقتها وأنا عندى هاجس من المسئولية وتحديدًا الحمل، خصوصًا بعدما حضرت ولادة إخواتى الاثنين مع أمى وشوفت مدى التعب والإرهاق، وخلال الفترة الماضية كان يراودنى سؤال واحد وهو: مين هيكون جنبى فى اللحظة دى؟
عن تجربتها مع «شعبى إف أم» قالت: قبل عملى فى «شعبى إف أم» كنت قد تركت قناة «سى بى سى» ودايمًا كنت بفكر «لو دلوقتى بقيت حامل هروح أقدم فى شغل إزاى!!» وسبحان الله جاءت لى فرصة العمل فى «شعبى إف إم» وتقديم برنامج «صباحو شعبى»، والمفاجأة أنى تانى يوم ليا فى المحطة عرفت أنى حامل، ودى كانت رسالة من ربنا، ورغم التوتر والخوف من رد فعل إدارة الراديو وتحديدًا خالد فتوح، مدير المحطة، إلا أنهم كانوا متفهمين جدًا للوضع الجديد.
وأضافت: فكرة أنى حامل أسعدتنى كثيرا، لكن عندما علمت أنى حامل فى توءم شعرت بارتباك وحدث لى ما يمكن أن أصفه بالصدمة المؤقتة، خصوصا أن تربية 2 فى نفس الوقت بمفردى أمر صعب وشاق، وهنا أحب أن أوضح أننى اخترت لتوءمى اسم «بقلظ وزقلظ».. يعنى قلت أدلعهم بأسماء مختلفة قبل ما يوصلوا الدنيا.
آلاء أضافت: بما أنى ليا تجارب أليمة مع الحمل، كنت دائمًا حريصة على شراء كتب تتعلق بالحمل والتربية وبعد فشل الحمل كنت برمى الكتب دى، لكن هذه المرة اشتريت أول كتاب بعد ما اطمنت أنى عديت مرحلة الخطر والحمد لله، واشتركت فى أبليكيشن خاص بالحوامل بقرأ منه أمتى الجنين بيبدأ يسمع، وعرفت أننى لا بد مع محمد زوجى أن نتكلم معهم ونسمعهم موسيقى بعد ما عرفت أنه الكلام مع الجنين وسماع الموسيقى له تأثير كبير عليهم فيما بعد. وحاليًا بسمعهم موسيقى لرقصات تانجو ولاتين عشان يحبوها ولما يكبروا يرقصوها، كذلك حرصت فى بداية الحمل على الحصول على كورس فى أكاديمية خاصة لأكون على دراية بكل ما يخص الأطفال.
وعن زوجها وممارستها لليوجا والزومبا، واصلت لتقول: الحمد لله محمد غير أزواج كتير أوى بترفض أن زوجاتهم يشتغلوا، خصوصًا بعد الحمل وتحديدًا مع واحدة مثلى مرت بتجارب صعبة، فهو متفهم جدًا حبى لعملى ومؤمن جدًا بأن فشل التجارب الماضية قضاء وقدر وليس تقصيرا منى، لكن بالتأكيد بيخاف عليا وبينصحنى لما ببذل مجهودا كبيرا، لأننى نشيطة جدًا وبحب أعمل أكتر من حاجة فى اليوم. وحاليًا بننزل سوا نختار هدوم البيبى وبنحضر لشنطة الولادة من دلوقتى بعد ما قريت أن طاقة الأم بتقل بداية من الشهر ال7.
أما بالنسبة لليوجا والزومبا، فقد كنت منتظمة فى كلاس الزومبا قبل الحمل وتوقفت بعد أول شهر، ثم بدأت فى كلاس يوجا مخصص للحوامل واستفدت جدًا منه.
وأخيرا.. تحدثت آلاء عن أمنياتها للفترة المقبلة وقالت: أتمنى أكون أم مختلفة فى تربية أولادى، وأقدر على تربيتهم فى غياب أمى زى ما هى ربتنى. وكنت بتمنى أعمل برنامج أونلاين أحكى فيه عن تجربتى الأولى فى الحمل بس لحد دلوقتى الفكرة قائمة، وحاليًا بجهز أنا ومحمد أكبر قدر من الصور لكل خطوة بنعملها لأولادنا عشان يشفوها لما يكبروا بداية من تحضير أوضتهم وملابسهم عشان يعرفوا احنا تعبنا قد إيه عشانهم.