محمد عطية يدافع عن مالك وشادي: «اللي حصل نتيجة طبيعية لغياب قنوات شرعية للتعبير»

دافع الفنان محمد عطية عن الفنان أحمد مالك والمراسل شادي حسين عبر صفحته الرسمية على الفيس بوك، حيث كتب قائلاً "أحمد مالك و شادى حسين ... التايم لاين كله مقلوب عليهم .. لإهانة الشرطة .. قول والمصحف ؟؟ مش إنت نفسك اللي كنت.. مبسوط قوي بقمعية الدولة؟؟ و هارينا اللي هينزل يبقي هو المسئول.. و فرحان في وقف باسم يوسف والمعارضين و بتأيد حبس المعارضة و شايفهم خطر علي البلد .. مش إنت اللي فضلت تبرر قتل شيماء الصباغ و غيرها والتصفية الجسدية اللي بنسمع عنها كل يوم و بتقول أحسن .. دول من عناصر الجماعة الإرهابية .. أنا عاوزك بقي تقولي علي طريقة للتعبير عن الرأي في السجن الكبير اللي إحنا فيه".
وتابع قائلاً "لو مالك وشادى نزلوا بيافطة ممكن يتسحلوا أو يتقتلوا عادي و إنت ساعتها هتبرر زي مابررت قبل كده .. إنت عارف فيه كام معتقل عشان حاول يعبر عن رأيه بسلمية ؟؟ إنت عارف إن فيه طفل محبوس بقاله سنتين إحتياطي عشان لابس تيشرت مكتوب عليه وطن بلا تعذيب .. إتحمقت قوي عشان اللي عمله مالك و شادى وبتطالب بمحاكمتهم ووقفهم ؟؟ يلا يا منفصم الشخصية يا منعدم الإنسانية منك له .. إنت بتقدس الدولة لدرجة إنك مش قابل إهانة في ضحك، ولو سخيف، عليها .. لكن عادي لو الدولة قتلت أو حبست أي مواطن إنت تمام".
وختم عطية كلامه على الفيس ب"اللي حصل من مالك وشادى نتيجة طبيعية لعدم وجود قنوات شرعية للتعبير عن الرأي والإحساس بالقهر والظلم ... و نظرا لأنهم متعلمين أو فنانين فكان التعبير بهزار سخيف .. المشكلة بقي يا حلو منك له في اللي ممكن يوصل بيهم القهر و الظلم لمرحلة أخطر من الهزار .. من الإسلاميين اللي بيتظلموا و غيرهم .. من هنا بييجي الإرهاب .. أحمد مالك إعتذر و وضح ندمه علي الفيديو .. عقبال الشرطة لما تعتذر و تبين ندمها علي القتل والسحل والإعتقال .. و دي بالمناسبة صورة شادى و هو مضروب بالخرطوش ومتعذب ومتبهدل .. عاوزك تتحمق قوي من الهزار وتسكت علي صورة زي دي .. يا مريض".
وقام محمد عطية بنشر صورة للمراسل شادي حسين اثر تعرضه في وقت سابق للاعتقال والضرب بالخرطوش على يد عناصر الشرطة.