عن موضوع الدود واللحمة

حد يقول كده؟! معقولة؟.. إنتى بتحبى تاكلى الدود؟!
ما قلتش كده. قلت إن فيه ناس بتحب تاكل الدود.
ما تفرقش.
لأ، تفرق.
يعنى شايفة إنهم ناس مقرفين؟
لأ طبعا.
شفتى؟! يعنى أنا صح.. بتحبى الدود.
ياسيدى لأ.. بس اللى بياكلوه مش مقرفين.
ترضى تاكلى دود؟
ماجربتش، ومش عاوزه.
يعنى إنتى زيى، شايفة إنهم مقرفين.
يا عم فيه أكثر من مليار بنى آدم على سطح الكرة الأرضية، ماعندهمش مانع ياكلوه، ويمكن بعضهم ميقدرش ياكل الفول بتاعنا.
هو الفول بتاعنا وحش؟
مش مسألة وحش وحلو. فيه ناس ممكن تكره شكله وطعمه وكل حاجة.
حد يقرف من حاجة زى كده؟
الناس مزاجات. ومحدش له حق يقرف من حد بيختلف عنه فى ميوله. ممكن جدا يكون فيه ناس على هذا الكوكب ما يستحملوش منظر طبق الفول بزيت الزيتون اللى بتعمله كل يوم جمعة. الفول اللى بتعجنه فى بعضه وتعومه فى زيت الزيتون وتحط عليه طماطم مقطعة وورق بقدونس مش بالضرورة يحظى بإجماع كونى!
اللى يقرف من ده يبقى مش طبيعى.
مش بالضرورة.. من حق كل واحد يحب ويكره. لكن مش من حق حد يكرهنى عشان باحب حاجة مختلفة.
فيه حاجات مافيش عليها خلاف.
زى؟
الكباب مثلا. شفتى حد بيكره الكباب؟
فيه ناس بتكره الكباب وبيقرفوا من أكل اللحوم. سيخ الكباب بيفكرهم بالحيوان الوديع وهو بيرعى فى المزارع. بيتخيلوا البقرة أو الجاموسة مع ولادها بيلعبوا وبترضعهم، وبعدين بيتصوروا الجزار بيشدها من ولادها الصغيرين بيصرخوا والبقرة بتتدبح، والدم بيسيل، والسكين بتغرز فى لحمها و....
كفاية.. كفاية.. حرام عليكى. كل ده فى الطبق؟! خلاص بلاش اللحمة. خدى عندك الملوخية. ما عليهاش خلاف.ا فاكرة لما عزمنا الخواجات بتوع المؤتمر؟
طب تصدق بالله إن فيه ناس لا يمكن تحط الملوخية على لسانها.
لازم لما تكون «قاطعة» يعنى ما لهاش «عرق».. ما بتشدش.. ماهى الملوخية صنعة.
تصدق بالله تانى إن فيه ناس مش ممكن تاكلها إلا وهى قاطعة.
مش معقول!!
السوريين بيعملوها بورقها كاملة وكمان بيعصروا عليها لمون.
بس اللمون يخليها تقطع..
بالضبط. ما بياكلوهاش لزجة.
معقولة؟! أنا ما أكلتهاش كده. تفتكرى طعمها بيبقى أحسن؟
مافيش أحسن وأوحش، كل شيخ وله طريقة، لو اتمشيت لحد تونس بيعملوا العكس تماما.
إزاي؟
ما بيخرطوهاش بس، بيطحنوها بودرة، وبتتحول لشوربة لزجة جدا وغامقة جدا وتقيلة وممكن تعيش.
دى مش ملوخية، دى مفتقة.. يع!
تااانى!! أفهمك إزاى إن الناس عاداتها بتختلف وده ما يخليناش نقرف من بعض.
فهمتك خلاص.. بس كنت عايز أسألك على حاجة.. بس مش عارف أقولها إزاى!
ياسيدى قول.. مالك؟
يعنى.. هل معنى كده إنك بتقرفى منى؟
أنا؟.. ليه بتقول كده؟
مش بتقولى إنك بتقرفى من الفول بزيت الزيتون اللى باعمله كل يوم جمعة؟!