انطلاق حملة «مش دافعين» لمواجهة ارتفاع الأسعار بكفر الدوار

قام شباب الثورة بمدينة كفر الدوار، أمس الأحد، أحد القلاع الصناعية الكبرى، بتوزيع بيان حملة "مش دافعين" المقرر انطلاقها الثلاثاء المقبل.

وجاء نص البيان: "اتكوينا من نار الأسعار اللي خلصت على مرتباتنا واتبهدلنا في المواصلات.. وواقفين طوابير قدام الأفران وأنابيب البوتاجاز.. وواقفين في طوابير البطالة، وكل ده وكمان جايين يغلوا أسعار الكهربا والغاز وحتى المياه اللي بنشربها والانفلات الأمني اللي في البلد وإحنا بنتثبت في الشوارع عيني عينك، والمخدرات بتتباع علنًا والبلد داخله علي خراب ألعن من الأول".

وأضاف البيان: "ببساطه إحنا عايزين العدل.. عايزين حقنا في ثروات بلادنا وعايزين نعرف المياه ثمنها بيزيد ليه إذا كانت المياه بتيجي من النيل والنيل زي ما هوه والكهرباء بتيجي من السد العالي والسد زي ماهوه وما اتغيرش والغاز بيطلع من أرضنا ومفيش حاجة اتغيرت تبقي الفواتير بتزيد ليه".

وطالب شباب الثورة بكفر الدوار، المواطنين، بالامتناع الجماعي عن دفع فواتير الغاز والكهرباء والمياه والتليفونات، وركوب المواصلات العامة مجانًا، ثانيا الامتناع الطوعي عن العمل.