خد بالك.. حملة سكندرية ضد فلول الحزب الوطني والحرامية

أنشأ مجموعة من شباب الإسكندرية جروب على موقع التواصل الاجتماعي الفيس بوك تحت مسمي "خد بالك"، بهدف توعية المواطنين من "فلول الحزب الوطني المنحل"؛ حسبما يقولون.

وحذرت الصفحة، التي تأسست يوم الأربعاء الماضي، من اقتراب موعد انتخابات مجلس الشعب، وعدم تنفيذ قرار العزل السياسي لأعضاء الحزب المنحل؛ ما يعطي لأولئك "الفلول" حق الترشح مرة أخرى، وكأن شيئا لم يكن؛ خصوصا وأن "الانتخابات القادمة تعتبر الانتخابات الأهم في تاريخ مصر"، قائلة: "إنت واخد بالك.. إن مجلس الشعب اللي جاي ده أهم مجلس شعب في تاريخ مصر؛ لأن المجلس ده اللي هيحط دستور مصر وهو اللي هيحط القوانين وهيراقب الحكومة والرئيس يبقي لازم تاخد بالك".

وحذرت الصفحة في إطار حملة التوعية، خد بالك، من انتخاب "اللي لابس شيك أو راكب عربية غالية"، أو"اللي هيديك 50 جنية ولا كيلو لحمة ولا قزازة زيت"، معللة ذلك بأنه "سيفعل كل ما يستطيع ليحافظ على فقرك؛ علشان يشتري صوتك الدورة الجاية برضوا بكيلوا لحمة".

كما أوضحت في حملتها التوعوية "خد بالك.. اوعي تنتخب حد علشان قالك لو انتخبتني هتخش الجنة"؛ قائلة "جنة ربنا بالإيمان والأعمال مش بالانتخابات"، وحذرت من انتخاب فلول النظام البائد لأنهم "سبب كل اللي احنا فيه ومش عايزينهم يوصلوا تاني لنفس المكان علشان يكملوا فساد وخراب"، على حد قول الصفحة.

وطالب أصحاب الصفحة كل المواطنين بنشر معلقات الحملة، البوسترات، علي نطاق واسع لتوعية الجميع قبل الانتخابات؛ حتى "نأمن شر أعضاء الحزب المنحل".

كما قامت الصفحة أيضا بنشر أسماء وصور من عناصر النظام البائد؛ لتحذير المواطنين منهم بصفة شخصية وتوعيتهم بالانتهاكات التي قاموا بها في ظل النظام المخلوع من فساد وتطاول علي القانون.