لو غلطنا أدونا فرصة نصلح.. 50 تصريحا ل رئيس مجلس إدارة بلبن في أول تعليق على أزمة الإغلاق

علق الدكتور مؤمن عادل المدير التنفيذي ورئيس مجلس إدارة شركة بلبن، على أزمة الشركة بعد غلق عدد من فروعها.
وقال خلال مداخلة هاتفية مع برنامج «الحكاية» الذي يُقدمه الإعلامي عمرو أديب، عبر شاشة «mbc مصر»، مساء الجمعة: فروعنا اتقفلت في يوم وليلة.. لما سألنا عن المشكلة محدش رد علينا رغم إن المفروض كان يتم إبلاغنا بالسبب.
وفيما يلي تصريحات رئيس مجلس الإدارة عن الأزمة بالكامل، وفقًا لقوله.
بداية الحلم.. من مصر للعالم العربي
-أنا مواطن مصري وأهلي كلهم مصريين وبنفتخر بكده.. بنفتخر بمصريتنا
-أنا طبيب بيطري، حاصل على بكالوريوس طب بيطري جامعة الإسكندرية
-رفضت إجراء أي حديث صحفي أو إعلامي طيلة المدة الماضية، وكنت أتمنى أتكلم في ظروف أحسن من دي
-إحنا مجموعة شباب مصريين قررنا إن إحنا نحلم، وقررنا إن إحنا نعمل كيان، والكيان موجود بفضل الله في 9 دول دلوقتي، والنهارده الحمد لله افتتاح أول فرع لينا في الكويت ودي الدولة العاشرة.

4 سنين بدون شكاوى.. وإشادة بالجودة
-بننتج ملايين الأطباق وملايين الوجبات بشكل يومي
-طول ال4 سنين اللي فاتوا مفيش أي شكاوي جت خالص من عندنا، مفيش ولا محضر تسمم، ولا محضر صحة، ولا أي مشاكل، سواء في مصر أو في الخارج
-خضعنا لزيارات من مفتشي الصحة، ومفتشين من كل الجهات، وكل جهات الدولة بتيجي تراقب علينا.
-خلال 4 سنين.. لم يغلق لنا محل بسبب أزمة صحية، ولا مشكلة واحدة حصلت مع مواطن، ولا حالة تسمم واحدة
-بنقدم أفضل جودة وأفضل خامة وأفضل حاجة ممكنة ممكن نقدمها للمواطن المصري أو للمواطن العربي بشكل عام يعني.

السعودية.. بداية الإغلاق والبيان الرسمي
-فرع السعودية اتقفل لأسباب صحية، وإن شاء الله هنفتح تاني.. والمملكة كانت جزءًا كبيرا من نجاحنا، هي القلب النابض بعد مصر. هي احتضنتنا وعملنا فيها استثمار مصري مشرف بفضل الله
-فروع السعودية اتقفلت لنتيجة حدوث اشتباه في حالات نزلات معوية، وده البيان اللي نزل من وزارة الصحة السعودية.
-في السعودية قالوا لنا هنقعد نبحث على السبب ونعمل غلق احترازي.

- مصر.. غلق مفاجئ بلا إنذار
-بعد كده هيئة سلامة الغذاء والدواء في الإمارات نزلت عندنا، وزارة الصحة في الإمارات وجدت مفيش مشكلة، الصحة في الأردن أيضًا موجدتش أي مشكلة، وفي مصر كان لحد وقت قريب مفيش مشكلة في أي حاجة، كانت كل العينات سليمة، لكن فجأة إحنا لقينا الوضع في مصر اختلف في يوم وليلة اتقفل كل الفروع بدون ما نعرف السبب.
-حالات تسمم؟ مفيش ولا محضر اتعمل ضدنا إلا محضر واحد اتعمل في الشيخ زايد ب"اشتباه بتلبك معوي"، وتواصلنا مع الشخص محرر المحضر واتفاهمنا معاه، وفرع الشيخ زايد شغال بأرقام كبيرة.
-إحنا بنبيع ملايين الوجبات شهريا
-لو فيه حالات تسمم موجودة بسببنا مش لازم تتثبت بمحاضر؟ مفيش ولا محضر اتحرر ضدنا
-بيان سلامة الغذاء اتكلم عن وجود "بكتيريا".. هل ده هيبقى في "بلبن وكنافة وبسبوسة ووهمي وبهيج وعم شلتت"، كلهم فيهم نفس البكتيريا؟!
-هم أدرى مننا.. وإحنا ملتزمين بشكل كامل بكل التعليمات اللي هي تأمرنا بيها الدولة

- ليس "بلبن" وحده.. 5 براندات أخرى
-للي حصل كله كان غريب ومفاجئ إحنا في في يوم وليلة اتقفل لنا الفروع كلها في: "بلبن، ووهمي، كرم الشام، بهيج، كنافة وبسبوسة"، 6 شركات كلهم بالكامل اتقفلوا في يوم وليلة
-سألنا إيه المشكلة اللي موجودة عندنا؟ ما فيش حد بلغنا
-اللي نفذ قرار الغلق الإداري مبلغناش بأي مشكلة
-إحنا عندنا 25 ألف عامل جوه مصر وبراها، كل الناس دي بيوتها بتتضرر، كل الناس دي بتتأثر، كل الناس دي بتتأذي نتيجة الغلق
-اللي تم غلقه 6 براندات مختلفة، بتقدم منتجات مختلفة.. هل كل دول فيهم نفس البكتيريا الممرضة؟
-إحنا ولاد البلد، إحنا مصريين وولاد البلد، الناس اللي شغالة دي بيوت مفتوحة، وإحنا علينا التزامات للبلد ضرايب بالملايين، عندنا التزامات للموردين بالملايين

- أنا مش طالب غير إننا نرجع نشتغل
-إحنا براند مصري، إحنا يا جماعة منكم.
-عايز تعمل غلق، قل لي الفروع اللي فيها مشكلة، قول لي يا مؤمن الفرع ده فيه مشكلة اقفله.
-160 محلا و5 مصانع اتقفلوا في يوم واحد.. هل دي حاجة حصلت قبل كده في مصر؟ هل حصل إن سلسلة تتقفل بالمنظر ده؟
-أنا خدام الدولة، واللي الدولة عايزاه أنا تحت أمرها فيه، واللي هيئة سلامة الغذاء والدواء يطلبوه مني أنا أعمله لهم، ولو خالفت تعليماتهم أتحاسب، بس بدون غلق الفروع
-هدفي في المداخلة إني أستغيث وأنادي: "الله يكرمكم إحنا داخلين على عيد العمال، داخلين على أيام مفترجة، يا ريت الله يكرمكم عندنا عمال قاعدة في بيوتها بيسألوني إحنا قفلنا ليه؟ وهيحصل فينا إيه؟ مش عارف أرد عليهم".
-أنا مع الدولة في أي حاجة تطلبها مني، أي حاجة تتطلب مني أنا أنفذها تماما من أي جهة.
-أتوسل إليكم، وأطلب إنقاذ مشروع استثماري مصري ناجح بيمثل مصر في 9 دول.
-إن شاء الله يبقى موجود في أمريكا ويبقى موجود في أوروبا قريب، أنا بتمنى نظرة نظرة عطف، نظرة أبوة، أتمنى إن أنتوا تساعدوني، تقفوا جنبي، مش طالب حاجة غير إن الفروع تتفتح.
-نشأنا من مصر.. وأشكر الدولة على كل حاجة.. وتحت أمر كل الجهات لمعالجة الأمر، ماننكرش فضل البلد علينا ولا ننكر إن إزاي السيد الرئيس بيدعم الصناعة وبيدعم الاستثمار. أتمنى من سيادة الرئيس ينظر إلينا بنظرة أبوة ونظرة عطف.
-احنا تحت مظلة القانون ومش عايزين أي حاجة فوق القواعد والقانون، مش عاوزين حاجة فوق حقنا.. عاوزين حقنا، لو أنا عندي مشكلة إديني فرصة أصلحها
-قيمتي الطبية والعلمية أقل من إن أنا أعلق على بيان لهيئة سلامة الغذاء والدواء، الموضوع ده منتهي.
- أنا متأكد إن شاء الله الأمور هتتحل والفروع هتفتح تاني، أنا راجل كبرت في البلد دي وهنعيش وهنموت فيها

- النجاح مش جريمة.. "بلبن" قصة يتعلموها برا
-الناس بره بتدرسنا في الجامعات، بتدرسنا في حالات نجاح، إحنا براند ناجح، نقف معاه ونكبره، اعتبرونا لعيب كورة، اعتبرونا أي حد ناجح، أي مصري ناجح.
-يعني أنا غلطت غلطة، طيب يعني قول لي اديني فرصة، هل أنا دلوقتي في حمل اللي بيحصل ده؟
- بلبن الحمد لله بالأرقام ومش هقول بالأرقام، هقول بشكل الناس قدام الفروع، وبعدد الناس، اللي إحنا بنعمله في كل الفروع، وبالإقبال الناس الشديد على المنتجات بتاعتنا.
-إحنا صناديق استثمارية كبيرة جداً عرضت علينا إن هي تدخل معانا من مختلف الدول
-الحمد لله إحنا براند ناجح، براند الناس بتقف عليك طوابير في الكويت، في السعودية، في مصر، في الإمارات.
-أنت النهارده براند الناس عايزاك، أنت تخاف من إيه؟ من واحد مش شغال وبيفتح، واحد ما عندوش زحمة لكن إحنا بفضل الله ربنا كرمنا بنجاح كبير
-المشروع اللي يحصل منه حاجة مخالفة ده اللي هو مشروع إيه؟ مشروع شغال حاجة بتتفتح وما عندهاش زباين وبيضرب أرقام، لكن إحنا مش كده خالص.
-بلبن المصري كسر الدنيا في الأردن، وهنا، أنا طالب بقى إن بلبن يتعامل معاملة ممثل، معاملة فنان
-إحنا بنصدر مانجا، بنصدر مواد تعبئة وتغليف
-يعني مصنع بي إي تي بتاع البلاستيك هو بيصدر لنا شغلنا لتسع دول أو 10 دول، المصنع ده مكانه في مصر، في العاشر من رمضان، دي عملة صعبة بتدخل البلد.
- أي نجاح ليه أعداء لكن ما عنديش مشاكل مع حد بعينه
-مفيش حد طلب مني يشاركني وأنا رفضت
- أرفض تماماً أن أي برنامج أو أي قناة عليها علامات استفهام تتكلم عن المشكلة أو تصدرها أنها مشكلة في البلد، مصر طول عمرها بتدعمنا وواقفة في ضهرنا.
-أنا ما اعرفش ال6 برندات اتقفلوا ليه، أنا ما اعرفش غير تقرير هيئة سلامة الغذاء والدواء اللي أنا بحترمه
-إحنا كل براند من دول براندات منفصلة، يعني كل واحد ليه مصنع منفصل، ليه إدارة منفصلة، ليه تشغيل منفصل، هل بقى كلهم في نفس اللحظة كلها بقى فيهم نفس البكتيريا
-اللي الدولة هتقوله واللي هم عايزينه إحنا هننفذه، بس بناشد كل القلوب الرحيمة اللي في البلد، بناشد كل الجهات اللي في البلد، بالله عليكم يا جماعة ما تقتلوش حلم شباب مصر، حرام الحلم بتاعنا يتقتل، ده ما يرضيش ربنا
-اللي هم شايفينه صح هيعملوه بس قول لي فرصة تصحيح وأنا عمري ما هتأخر إن أعمل حاجة الدولة شايفاها أو عاوزاها.
-هنقلل السكر بناءً على طلبكم وإحنا مستعدين لو الهيئة تساعدنا ونقف وتقول لنا نعمل إيه ونشتغل في أي حاجة هم عايزينها

- أزمة تراخيص
-لما اتقفل الفروع بتاعة مصر الجديدة، روحنا لمحافظة القاهرة قلنا له إحنا عايزين نفتح الفروع، رفض يقابلنا، روحنا للسكرتير العام للمحافظة، قالوا ما نعرفش حاجة عن الموضوع، 12 فرعا اتقفلوا بسبب الترخيص.
قالوا مش هتفتح الفروع دلوقتي، أنت ما عندناش تعليمات بكده، والمحافظ قال لك أنا ما اعرفش حاجة عن الموضوع.
- كل المحلات اللي عندنا مقدمين فيها يا إما تراخيصها معمولة يا إما مقدمين فيها في البوابة الإلكترونية، لكن المحل الرخصة بتاعته بتاخد وقت طويل جداً، بتاخد أكتر من 6 شهور أو سنة لموافقة الحماية المدنية، وموافقة الهيئة السلامة، وموافقة الصحة، وغيرها.
-كل المحلات اللي في مصر شغالة طالما أنت قدمت على البوابة وقدمت الأوراق الأولانية واستوفيتها فده بمثابة إن أنت المحل شغال، ده اللي احنا اتعودنا عليه
-فجأة قال لك لأ أنت إزاي ما خلصتش الرخصة؟ طب ما الرخصة أصلاً عشان أطلعها عايزة سنة، وفي اشتراطات وفي شهادات بتتاخد في الرخصة لازم أكون فاتح في عشان أخدها زي الحماية المدنية زي تقرير الهيئة
-اتمنى بس أقول بلبن من البلد، سواء اختلفت معاه أو اتفقت بس مفيش حاجة في الدنيا توازي إن 25 ألف أسرة مش عارفين هم مصيرهم إيه.
-أتمنى من المسئولين، يقولوا لنا الفروع اللي فيها مشاكل نقفلها، بس بلاش قعدة الناس في بيوتها