المؤلف محمد أمين راضي عن اعتذار محمد سلام: فعل غير مهني بالمرة

عبر المؤلف محمد أمين راضي، عن رأيه في فعل الفنان محمد سلام، بالاعتذار عن عدم السفر إلى السعودية لتقديم مسرحية «زواج اصطناعي» في موسم الرياض، تضامنا مع الشعب الفلسطيني لما يتعرض له من عدوان غاشم من جيش الاحتلال، مؤكدا أن هذا الفعل غير مهني على حد تعبيره.
وكتب محمد أمين راضي عبر حسابه على موقع «فيسبوك»: «مش قادر.. مش قادر.. مبدأ إني علشان بحب محمد سلام جدا، فأقرر ما قولش رأيي بصراحة مضايقني.. من أول ما قولت لنفسي كده امبارح، لأن على الجانب الآخر ما صلاح الجهيني صاحبي.. بس حقيقي بعيد بقى عن المحبة والصداقة، اللي عمله سلام فعل غير مهني بالمرة».
وتابع: «حتى ولو مشاعره صادقة.. كان عادي يعتذر من أسبوع، مش قبلها بيوم، وكان عادي خلاص برضه ده يحصل بصمت، بدون أي فيديوهات تحرج زمايله اللي موجودين حاليا، وبتحرج أكثر اللي هيجي بعده».
وأضاف: «خصوصا إن سار العرف إن الواحد بيعمل الفيديوهات اللي بيوضح فيها موقفه للناس اللي هو عامل حاجة غلط في حقهم أو اللي زعلانين منه.. اللي همه في الحالة دي، الجمهور اللي قطع التذاكر بناء على الإعلانات اللي هو موجود فيها لحد امبارح، وطبعا الفيديو المعمول مش موجه خالص للجمهور اللي بتكلم عليه».
وأكد: «الأهم بقى من كل ده، وفوق كل ده، الفن مش رفاهية.. الفن مش رفاهية أو شيء ممارسته تسيء وتقلل من هيبة الحزن.. ومش هتكلم خالص عن خصوصية الفن ودوره خالص.. أنا مش هتكلم إلا على كونه مهنة.. ما فيش أي مهنة بيتطلب منها أو بيتطوع صحابها من نفسهم بالتوقف عشان الظروف إلا أحنا».
وأوضح: «ما قبلتش أنا حد في بنك قرر يستقيل عشان خاله مات مثلا.. وحقيقي أنا مش فاهم إيه اللي حصل، أنا واحد أتربى على جيل من الفانين كانوا بيتفاخروا، بأن أقرب الأقربين ليهم، أبوهم مات وهمه دفنوه وطلعوا على المسرح علشان عندهم ميعاد خشبة مسرح، وعندهم جمهور قاطع تذاكر واحترامه شيء مقدس.. سيد مكاوي وآخرين كان بيسافر الجبهة بتاعت الحرب عندنا أحنا علشان يعملولهم حفلات مخصوص لرفع من روحهم المعنوية.. فاللي أحنا بنتكلم فيه لا هو بدعة ولا أفورة مننا.. في حقيقة الأمر أنتوا مبتذلين».
وكان أعلن الفنان محمد سلام اعتذاره عن عدم السفر إلى السعودية لتقديم مسرحية «زواج اصطناعي» في موسم الرياض، تضامنا مع الشعب الفلسطيني لما يتعرض له من عدوان غاشم من جيش الاحتلال.
وقال محمد سلام في فيديو نشره عبر حسابه على موقع «إنستجرام»، قائلًا: «السلام عليكم ورحمة الله إن شاء الله المفروض أسافر الرياض عشان أعرض مسرحية زواج اصطناعي في موسم الرياض والمفروض إنها مسرحية كوميدية وفيها أغاني واستعراضات والمفروض إننا نعرض يوم 30 أكتوبر».
وتابع سلام: «هنعرض في وسط الأحداث اللي بتحصل في غزة فأنا مش متخيل إني هروح أعمل مسرحية وأهزر وارقص وإخواتنا في فلسطين عمالين يتقتلوا ويدبحوا ومفيش حاجة بتحصلهم»، بحسب وصفه.
وأوضح: «أنا مش هقدر أسافر طبعا وليه بقول الكلام ده في آخر لحظة المفروض إني أسافر بكره إن شاء شاء لأني كنت على أمل أن الموسم يتلغي أو يتأجل مثل مهرجانات الجونة، والقاهرة أو الموضوع يهدى في فلسطين، ونقدر نعرض لكن مفيش حاجة بتحصل لحد دلوقتي في ناس عمالة تموت ومفيش حاجة بتحصل، فأنا ازاي أروح اعرض وناس بتموت في فلسطين».
وأضاف: «حاسس لو أنا عملت كده هبقى كأني زي اللي بقتلهم بالظبط، هبقى خذلتهم وهبقى بغني وارقص، فأنا بعتذر عن المشاركة في موسم الرياض واللي بيحصل في فلسطين قضية كل مسلم، وواجب على كل مسلم، فأنا مش في إيدي حاجة أقدر أقدمها، فلما نموت وربنا يسألنا عملت إيه لأخوك في فلسطين أنا هرد أقول إيه؟ هقول في وقت الأحداث في فلسطين أنا كنت بعمل مسرحية كوميدية وبرقص وأغني فأنا مش هقدر أعمل كده».
واستطرد: «كان عندي الموسم يتأجل أو يتلغى، فأنا مش هقدر أشارك في المهرجان ده وحابب أقول إني كنت في مشكلة مش عارف أسافر ولا أعمل إيه؟ والتمثيل هو أكل عيشي، لكن لو مسافرتش هل هموت من الجوع؟ بالتأكيد لا».