رجب بحة لمرتضى منصور: حرام عليك شوهت سمعتي معايا بنات على وش جواز

انتشر على منصات السوشيال ميديا، صباح اليوم السبت، مقطع فيديو للحاج رجب محمد شحاتة الذي اتهمه مرتضى منصور باستخدام السحر لهزيمة الزمالك 4-1 من الأهلي في مباراة القمة.
وخرج مرتضى منصور، رئيس الزمالك المعزول بحكم قضائي بات ونهائي، في الساعات الماضية يؤكد أن فريقه لم يخسر من الأهلي بسبب منشطات أو أخطاء ولكن بسبب ساحر يدعى رجب بحة من الفيوم في قرية منية الحيط بمركز إطسا.
وظهر الحاج رجب في مقطع الفيديو يقول:" بسم الله الرحمن الرحيم أنا رجب محمد شحاتة سيادة المستشار اتهمني بالباطل أني ساحر ودجال أقسم بالله العظيم أنا راجل أمي لا بعرف أقرأ ولا أكتب مش بعرف أسحر واللي يعمل كدة مشرك بالله".
أضاف:" أنا راجل عامل بناء شغال بأيدي على الله أرزقي، عايشين في بيت مش هترضاه لنفسك، اللي قلته غلط وما ينفعش حرام عليك لما تشوه سمعة ولادي ومعايا بنات على وش جواز أقسم بالله معرفش أعمل سحر أنا حافظ القرآن وخسارة الزمالك سببها أن لاعيبتك تعبانة".
ورد شخصًا آخر من أهالي قرية منية الحيط على اتهام مرتضى منصور:"يا سيادة المستشار انت راجل دولة، إزاي تتكلم بالطريقة دي على الناس، وإزاي بتتهم الناس بالباطل عشان واحد قالك كلمتين تطلع على الهوا، في بث مباشر تتكلم على ولاد الناس، الراجل دا لا يعرف الأهلي ولا يعرف الزمالك، دا راجل بنا، راجل أمي ميعرفش يكتب اسمه".