الاعتداء على تمريض مستشفى قويسنا.. شقيقة زوج المريضة: بيعاملونا باستهتار وضربوا ست كبيرة بالقلم

ما زالت واقعة تعدي أهل مريضة على الطاقم الطبي والتمريض والعمال في مستشفى قويسنا المركزي في محافظة المنوفية، تثير الرأي العام والغضب بين الجميع.
وكان عدد من أهالي قويسنا، تداولوا مقطع فيديو يوضح تعدي أحد المواطنين على طاقم التمريض بمستشفى قويسنا المركزي بالضرب والسب وكذلك خطف تليفونات الممرضات لمنعهم من تصوير الواقعة.
وكشفت فاطمة السد العالي شقيقة زوج المريضة، المتهمين في واقعة الاعتداء على الطاقم الطبي والتمريض بمستشفي قويسنا، تفاصيل الواقعة في محاولة للدفاع عن أنفسهم.
وقالت فاطمة، عبر صفحتها على موقع التواصل الاجتماعي "فيسبوك": "إحنا جايين نسعف مريضة هنجيب آلات حادة معانا ليه، مستشفى قويسنا بيعامل الناس بكل استهتار ولامبالاة وقلة ذوق، وعادي يقولك ماتموت نعملها إيه، وكل الممرضين زعلانين من رد فعل أهل مريضة بتموت، ويقولوا زميلتنا متضربش، بس عادي واحدة تموت في داهية، ويقلوا أدبهم على ست كبيرة فوق ال60 سنة، ويمدوا إيدهم عليها وضربوها بالقلم وزقوها ع الأرض على ضهرها".
وتابعت: "علشان الفيديو مش متصور فالناس مش فاهمة حاجة، وطلبنا بتفريغ كاميرات المستشفى، وكله هيوضح، والناس تقولهم الحالة بتنزف وبتموت يردوا بكل برود (نعملكوا إيه مفيش دكاترة دلوقتي)، وللعلم اللي كان بيكلم أهل المريضة بتوع النظافة مش التمريض، وهما اللي ابتدوا بالتعدي على الست الكبيرة، ولولا عيالها كانوا موتوا الست الكبيرة من الضرب، مفيش أى كرباج والله العظيم دا سلك كان مربوط بيه الكرسى".
وأضافت: "المريضة سقطت والله العظيم، وضربوا المريضة وسببوا لها انفصال في المشيمة ودخلت في غيبوبة ودلوقتى في حالة حرجة جدا، عاوزين رد الفعل يبقى عامل إزاي، ولا كان فى كرباج ولا صاعق كهرباء والله العظيم، عمال النظافة هما اللي بيضربوا يجماعة والممرضين والله العظيم".
وكانت مستشفى قويسنا المركزي، شهدت اعتداء بالضرب على الممرضين والعمال من قبل أهل مريضة حيث تدوال فيديو يظهر فيه الاعتداء على الممرضات ومحاولة خطف هواتفهم المحمولة.
فيما أكد شاهد عيان داخل مستشفى قويسنا المركزي، أن أهل مريضة كانت تعاني من نزيف اصطحبوها إلى المستشفى، وطالبوا باستدعاء الطبيب المختص فأخبرهم الممرضين باستدعاءه ولكن سادت حالة من الغضب أدى إلى مشاجرة داخل المستشفى، اعتدى من خلالها أهل المريضة على الطاقم الطبي والتمريض.
فيما أكدت الدكتورة رشا خضر وكيل مديرية الصحة بمحافظة المنوفية أنه يتم التحقيق في الواقعة في النيابة والأمر قيد التحقيقات.