شدتها من الطرحة وصاحبي ضربها ب كتر في وشها.. اعترافات طفل تحرش بطالبة في العمرانية

تحقق نيابة الطفل، في اتهام طفلين مراهقين بالتحرش بطالبة أمام مدرستها في العمرانية، والتعرض لها بالطريق العام، والإشارة لها بإيحاءات جنسية، وإصابتها بجرح 20 سم في وجهها بسلاح أبيض "كتر".
حصلت "الشروق" على نص أقوال الفتاة المجني عليها، والتحقيقات مع المتهمين "م" 13 عاما، و"م" 14 عاما، طالبين، والمحبوسين على ذمة التحقيقات بتاريخ 24 فبراير 2022، في القضية التي حملت رقم 3074 لسنة 2022 جنح العمرانية.
قالت المجني عليها في أقوالها أمام النيابة: "كنت رايحة المدرسة أنا وصاحبتي، وكان في ولدين واقفين فوق الكوبري اللي قدام المدرسة، كانوا بيرخموا علينا وبيحدفوا علينا طوب، سألتهم (أنتوا ليه بتحدفوا علينا طوب؟)، راح واحد منهم شتمني، واللي كان معاه بيضحك، وبعد كده دخلت المدرسة".
وأضافت: "لما خرجت من المدرسة، لقيتهم لسه واقفين على الكوبري، روحت قولت لصاحبتي استني شوية لما يمشوا، ولما جيت أمشي لقيت المتهم جالي، وقالي (بقى أنتِ بتشتميني؟)، قولتله (أيوه علشان أنت شتمتني وحدفت عليا طوب)، راح شتمني تاني وضربني في كتفي".
وتابعت: "لما حاولت أمشي، شدني من الطرحة ووقعني على الأرض، وقعد يضربني بالرجل، وأنا باقوم، راح صاحبه شاورلي بصباعه بحركة قليلة أدب، وأنا باحاول أدافع عن نفسي، لقيته راح مطلع سلاح أبيض (كتر)، وضربني بيه في وشي، وطلعوا يجروا، وأمي ودتني على المستشفى الإسلامية اللي في العمرانية، وبعد كده حولوني على مستشفى قصر العيني، وخيطوا الجرح، وبعد كده روحت عملت محضرا في القسم".
وأشارت، في أقوالها، إلى أن الواقعة كانت يوم 24 فبراير الماضي، وليس لديها سابق معرفة بالمتهمين، متابعة: "واحد شتمني في الأول ورمى عليا طوب، ولما خرجت من المدرسة شتمني تاني وضربني ووقعني على الأرض، والثاني شاورلي بإيده بحركة مش كويسة وضربني وعورني ب(الكتر) في وشي".
وفي المقابل، استمعت النيابة إلى أقوال المتهم الأول بعدما وجهت له تهم التحرش بالمجني عليها، والتعرض لها بالطريق العام، وإتيان أمور وإيحاءات جنسية، وكان ذلك بالقول والفعل والإشارة، وإحداث إصابتها الموصوفة بالتقرير الطبي المرفق بالأوراق، التي أعجزتها عن القيام بأعمالها الشخصية مدة لا تجاوز 20 يوما، وكان ذلك باستخدام سلاح أبيض "كتر".
واعترف المتهم الأول، قائلا: "أنا ضربتها بس، لكن ماعملتش لها أي إشارات جنسية، واللي كان معاه (الكتر) صاحبي، وهو اللي ضربها بيه في وشها".
وأضاف: "أنا كنت راجع من المدرسة بتاعتي وماشي على الكوبري عند المدرسة، وكان في شباب بيعاكسوا كذا بنت وهي منهم، رحت زقيت البنات وقلتلهم امشوا، راحت البنت دي قالتلي (ملكش دعوة)، روحت زقتها، قامت قالعة الشبشب وضربتني بيه، رحت ماسكها من الطرحة، فصاحبتها قالتلي (حرام عليك)، فصالحتها وسيبتها".
وتبين من تقرير الكشف الطبي، وجود جرح قطعي بالوجه والجبهة طوله نحو 20 سم، وتم عمل غرز خارج المستشفى، ويوجد كدمة بالأنف والعين اليسرى، وتحتاج إلى العرض على أخصائي الرمد والأنف والأذن.
وتعود أحداث الواقعة إلى قيام شخصين أمام مدرسة في العمرانية، بالاعتداء على فتاة والتحرش بها، وتوجهت المجني عليها بعد الواقعة إلى قسم شرطة العمرانية، وتقدمت ببلاغ ضد المتهمين بالتحرش بها.
تحركت قوات الأمن بناء على بلاغ الفتاة، وتم عمل التحريات اللازمة عن الواقعة، وأثبتت التحريات صحتها، وبعد تحديد هوية الجناة، تمكنت أجهزة الأمن من إلقاء القبض على المتهمين، وحرر محضر بالواقعة.