آخرها ذهبية مستر أولمبيا.. أماني ربيع تحصد أكثر من 50 ميدالية في رياضة القوة

"عايزة كل ما أسافر بره أرجع بذهب، عايزة على طول أبقى مشرفة بلدي، عايزة يقولوا الست المصرية دي مفيش منها اتنين"، بتلك الكلمات عبرت "أماني ربيع" عن سعادتها بحصولها على ميدالية ذهبية عن لعبة الباورلفتنج في مسابقة "مستر أولمبيا" بالولايات المتحدة الأمريكية 2021.
و"الباور ليفتنج" أو "رياضة القوة" هي لعبة فردية الهدف منها رفع أكبر قدر ممكن من الوزن في تمرين القرفصاء، وضغط البنش، والرفعة الميتة، وذلك في فئة وزن وفئة عمرية محددة، ولدى الرياضيين 3 محاولات للوصول إلى أقصى طاقتهم، ويجب اتباع قواعد تقنية صارمة للمساواة بين الجميع.
تقول أماني ربيع، ذات ال59 عامًا، إنها جدة لديها أحفاد و"العمر مجرد رقم"، والرياضة ليس لها سن محدد، مشيرة إلى أنها مارست أكثر من لعبة لكنها وجدت شخصيتها وحلمها في لعبة الحديد، مضيفة أن لعبة الحديد تساعدها على التخلص من الطاقة السلبية ومشاكل الحياة؛ لذا تشعر دائما بالسعادة وهي أكثر غايتها.
بدأت مس أولمبيا، رياضة الباور ليفتنج منذ 4 سنوات، وشاركت في عدد كبير من البطولات والمحافل الدولية فحصدت خلال تلك الفترة 40 ميدالية ذهب في بطولة الجمهورية، و7 ميداليات ذهب في 3 بطولات عرب، وحققت في مستر أولمبيا مرتين 2 ذهب، وواحدة برونز.
من جانبه، يقول محمد سعيد –مدرب أماني- "أهم حاجة عندنا عنصر القوة، فطبعا إحنا بنتنافس إننا نحقق أكبر شيلات أو أكبر رفعات ممكنة في الرياضة بتاعتنا، وده بيحتاج حد مميز من الناحية النفسية كمان، فأنا لازم من خلال خطة على المدى البعيد لتأهيل اللاعب كإعداد بدني بيصاحبه إعداد نفسي، أغرس فيه السمات النفسية اللي هي قوة الإرادة والشجاعة والتحمل والإقدام والمواجهة".
ويضيف: "إحنا بنعمل حاجة اسمها (باور بلدنج) يعني بنعمل (باور ليفتنج) على (بدي بلدينج)، لعبتين في لعبة واحدة لإن لازم أقوم بتأهيله جسمانيا زي ما قولت ولازم أخلي شكله قوي وعضلاته حجمها أكبر عشان تقدر تشيل أكثر، بالإضافة لعنصر القوة، إن إحنا بنتعرض لأحمال تدريبية عالية وأحمال متدرجة أهم حاجة تبقى متدرجة عشان مانتعرضتش لإصابات، فبالتالي بيتعرض للأحمال دي فالآخر بينشأ بعد الكلام ده كله، بطل بيقدر ينافس بيقدر يحقق أرقام عالمية، يقدر يواجه، يقدر يجيبلنا بطولات لمصر في المحافل الدولية والبطولات الكبيرة، زي (أماني) ماعملت مثلا في مستر أولمبيا".
توضح أماني أن لعبة الباور ليفتنج ليست سهلة كما يعتقد البعض: "الحديد ده مشكلته إنك لو سبتيه هيسيبك، فلازم تبقي مستمرة وبتتمرني على طول، علشان جسمك يجمد وتعرفي تشيلي".
تتمرن أماني 4 أيام في الأسبوع من 3-4 ساعات، ولا تعتمد على أي مكملات غذائية، بل تحرص على تناول وجبات غذائية غنية بالعناصر الطبيعية، وتدخل معسكر مغلق للاستعداد للبطولة قبلها بشهرين، وتخضع لتمرينات عنيفة لتقوية كل عضلات الجسم.
تقول أماني في حوارها مع "الشروق"، إن التحدي الأكبر لها أنها تواجه الأصغر سنًا، لتمتعهم بقوة بدنية وصحة أعلى لكنها مؤمنة بقدرتها على اجتيازهم بسهولة، مشيدة بدعم المدرب لها: "كان دايما يقولك إيه حديد تحته حديد، أنت هتشيليها هتشيليها، إحنا داخلين يا قاتل يا مقتول".
وتتابع: "اللعبة دي بالذات بتعمل شيب حلو جدا في الجسم، سواء بنات أو ولاد، اللي بيعضلوا أوي بقى وبيعملوا الشيب ده هما عايزين يعضلوا كدا، بياخدوا حاجات خارجية إحنا ملناش فيها، طول ما أنت بتلعبي حديد ومبتاخديش حاجة عادية خالص بيبقى جسمك متقسم بالعكس جامد مشدود في سني ده الناس كلها بتعمل عمليات، أنا طبيعية لأن اللعبة بتشد الجسم".
تستعد أماني للمشاركة في بطولة كأس العالم قريبًا، وتؤكد أن لعبة الحديد سبب سعادتها في الحياة، وتحلم أن ترفع اسم مصر عاليًا في كل المحافل الدولية.