أم طالبة أمام إحدى لجان الثانوية: «منمناش من امبارح وتعبانين.. ولو الامتحان سهل كله يهون»

"البوكليت طويل جدا وبنتي منامتش من امبارح".. هكذا قالت إحدي أولياء الأمور من أمام مدرسة يوسف جاد الله الإعدادية بنات بالهرم، والتي كانت تنتظر ابنتها التي تؤدي امتحان مادة اللغة العربية، اليوم الأحد، مضيفة: "خايفين من مفاجآت الامتحان والتركات اللي في النحو والأدب، مش البوكليت بس".
واستكملت ولي الأمر ل«الشروق»: "كمان موضوع التعبير أصبح الآن الإجابة في جمل ونقاط، وخايفة بنتي تتلخبط لأن دا نظام جديد ومقلق، وخايفة علشان أسئلة البوكليت كتيرة وممكن مساحة الإجابة متكفيش"، فتدخل عليها ولي أمر طالبة أخرى، قائلًا: "لا، رضا حجازي رئيس امتحانات الثانوية قال إنهم سايبين 3 ورقات إجابة في آخر ورقة الامتحان"، فردت الأولى: "بس المدرس بتاع بنتي قالها مش مضمونى، وخايفين كمان علشان بيقولوا أن أي أخطاء أو شخبطة هتعمل مشكلى".
وأضافت ولي أمر: "احنا منمناش من امبارح وتعبانين وقلقانين، والعيال مش حاسين برمضان من كتر توترهم، كانوا أجلوها أسبوعين بعد رمضان،مفيش وقت طويل بين المواد يوم امتحان ويوم إجازة، والمفروض كانوا زودوا الأيام بينهم، ويومين ونص فقط أمام الفيزياء ربنا يستر، كانت من قبل 4 أيام، لكن لو الامتحانات جت سهلة مش مشكلة كل تعبنا يهون".
وتخوفت ولي الأمر قائلة: "بعض الأسئلة تتضمن اختار بين (أ وب) ولو بنتي أجابت على النقطة (أ) ثم أجابت على النقطة (ب) وكانت إجابتها في النقطة (ب) تحصل على درجة أعلى من (أ) سيختاروا إجابة رقم (أ)، والمفروض يختاروا الإجابة صاحبة الدرجة الأعلى".