إبراهيم فايق: القرد لسه بيتنطط!!

حبة أسئلة من غير إجابات.. مش فوازير، إنما تقدر تقول عليها فضفضة أو هلفطة أو حتى حبة فلفصة وشوية فرهدة.
هو ليه ولا مؤاخذة الثورة قلعت جميع المفسدين والفاسدين والمتلاعبين وماقلعتش أهل الجبلاية؟
هو ليه مزايدة البث اتلغت؟
ولا مؤاخذة.. إيهاب صالح.. قائم بأعمال المدير التنفيذي ولاخلاص بقى تنفيذي؟ هي المسابقة أتعملت؟
مين اللي بيشتغل في الموقع الرسمي للاتحاد؟ عددهم كام؟ وفيهم صحفيين ولا لأ؟
هو فيه في مصر كرة خماسية؟
أه فيه حتى.. شاطئية؟
طب.. إيه أخبار الكرة النسائية؟
اللي يعرف أي حاجة عن التلاتة اللي فاتوا.. يرفع صباعه!!
هو الكأس التالت للأمم الإفريقية طلع في بيت مين؟ والتحقيق اللي اتفتح نتايجه إيه؟
الكأس الأصلية وصلت الجبلاية.. ولا لسه في الكاف؟
بيقولوا ممنوع عضو مجلس يبقى رئيس لجنة في الاتحاد.. هو الكابتن مجدي عبد الغني بيعمل إيه في شئون اللاعبين؟
فين التحقيق اللي اتفتح في موضوع الجزائر؟
حماده شادي المتهم بتكدير الأمن العام لأنه اتهم زاهر بتكسير أتوبيس الجزائر.. بيشتغل إزاي في اللجنة الخارجية.. هو مش فيه ضده بلاغ للنائب العام من رئيس الاتحاد نفسه؟
فتحي نصير بيشتغل مدير فني للاتحاد؟؟ ولا منسق دفاتر؟
توزيع رئاسة البعثات بيتم إزاي؟ بالحب ولا بالجدعنة ولا بالدراع؟
أخبار موضوع غسيل الأموال إيه؟ بيقولوا الإنتربول نازل مصر يحقق.. صحيح ده ولا لأ؟
هو حسن شحاتة استقال ولا أقيل؟ طب أخد فلوسه ولا لسه على ذمة الاتحاد؟
فينجادا مشي ليه؟
كلود لوروا ورينارد وطلعت يوسف وطارق يحيى ومختار مختار.. محدش فيهم بقى مدير فني للمنتخب ليه؟
هو يوم الخميس بتاع إعلان اسم المدير الفني فات ولا لسه؟
ماتورانا وبرادلي وراجيفتش.. وزكي جمعة وعلى علوكة وأشرف كخة.. مين بيتفاوض معاهم؟
هو مورينيو وقع للإنتر والريال في قد إيه ؟
فين خطوات تطبيق دوري المحترفين؟
ليه مفيش عدالة في توزيع نسب البث الفضائي؟
أخبار موضوع سحب الثقة إيه؟
طب أخبار الشاي بالياسمين إيه؟
المادة 18.. جابوا الخبير العالمي الدولي اللهلبي اللاوذعي اللي هيفسرها ولا لسه تحت إيده تي شيرت بيفصله؟
هو فيه لائحة في الدنيا.. تقول شمروخ واحد ينفع.. اتنين ماشي.. تلاتة لأ؟
هم بينقلوا ماتشات بره الأرض لما الجمهور يخرج عن النص؟
إزاي يتلغي الهبوط في مسابقات القسم الثالث والفرق بتلعب منافسات حامية؟
بيع الماتشات في الممتاز ب؟ ماشي كويس ولا إيه الأخبار؟
ليه اتلغى الهبوط؟
دورة الترقي.. دي بمناسبة رمضان ولا دورة بجد.. اللي بيصعد فيها بيكون بفارق الأهداف.. ولا اللوائح مختلفة؟
اشمعنى يعني 20 فريق؟ ليه الدوري مثلا مش 25 أو 26 أو 30 لتوسيع القاعدة؟!! إحم ولا مؤاخذة قولت 20 أنا صح؟.. أقصد يعني ليه 19.
هو ليه الاتحاد قفش على المنصورة والترسانة وأسوان؟.
الدوري هيتلعب إمتى؟
طب على كام مرحلة؟
شكله إيه؟ مجموعات ولا على قديمه؟
كأس مصر؟
كأس السوبر!!
الانتخابات التكميلية؟
تجميد النشاط!!
المخالفات الإدارية!!
يا كابتن سمير.. الكتكوت عمره ما يفضل يرقص طول عمره.. والقرد بطل تنطيط من زمااااان.
*