شهداء الجمعة

صحوني من الحلم دة مش عايز أموت
جنازة فيها اكثر من 100 تابوت
وسع عشان الجنازة لازم تفوت
ناس تقول الشهادة وسط السكوت
مرت عيني بلهفة بين البيوت
هتفت انده عيالي ماسمعت صوت !!!
*************************
جاهز وهاجي معاكم من غير سؤال
ولا عايز اكتب وصية ولا عندي مال
في دقيقة واحدة أكلم أم العيال
ماهو أصل حق الكفن جوة الشوال
وكام قيراط يكفوكي شر السؤال
ربي العيال بعدي من مال حلال
********************
مش حلم لا دة كابوس هاتوا لي أولادي
نازلين صلاة الجمعة كأنه يوم عادي
كان وعدي بعد الصلاة ننزل على الوادي
هنجيب حاجات حلوة لمولد الهادي
سمعت ابني بيصرخ والتاني بينادي
مين قاتل الابرياء أي انتقام سادي !!
*********************
سمعت صوت الرصاص إتشل تفكيري
قتلني غيلة و غدر مجرم و تكفيري
بيقول دة شرع الله قتلي و تفجيري
وأهلي ايه ذنبهم يعيشوا من غيري؟
حرمة بيوت الله في قلبي وضميري
أدخلها أعزل مسالم وانا راضي بمصيري
***********************
أهلي لا ياخدوا عزا ولا يقبلوا دية
غير لما ياخدوا التار من الي غدر بيَ
أنا أهلي كل البلد مش بس سيناوية
شرطة وشعب وجيش معقودة النية
حتى الكهوف في الجبل راح تنتقم لي
من غير محاكمة ولا نيابة ولا قضية