من خواطرى: خلص الكلام

كان عندي واحد صاحبي وكان عنده شله عملاله غسيل مخ…
صاحب البنت دي.. لأ البس دي.. روح هاتلنا علبه بلمونت.. لأ شويه لب..
يعني مرماتون من الاخر وهو للأسف شايف إنها جدعنه وطيبه من ناحيته وهم ( آل يعني عاملينه صاحبهم ) مش فارقه اوي هو مين علي أد إنجازه معاهم ايه.. طبعا مع رمي فتات نفخ فيه..
يابو الرجاله.. يا جمالك ياعم الشباب أهو ده الكلام.. لتثبيته أكتر..
صاحبي ده اتعرفت عليه في ظروف غريبه وللأسف في نظري انه كان غلبان ولكن لزقه ومش عارفه ازاي إتفرض عليا من الناس اللي معايا, وانا دايما معترضه ومش عاجبني تصرفاته.. كلمته كذا مره بيني وبينه.. زعل وعًند وركب دماغه وكلموه اصاحبي قلب عليهم قلبه وزعل منهم لدرجه انهم سابوه وبعدوا وانا اللي لسه لابساه.
هو بني آدم ولكن مسير جدا.. ملغي من شلته وياحرام ساعات اشعر انه وحيد ومش عارف يعمل ايه!
ومتأكده انه لو لثواني ان الصح لاح له, في اقل منها يرجع يرتد لتفكيره المشوش العشوائي والمنقاد.
سألته مره الناس كرهاك انت وشلتك حتي بناتكوا دمها تقيل وطريقه لبسكوا مش مهندمه فيها هرجله ومن غير ذوق وكلامكم هرتله مليان حشو زي التعبير في المدرسه لعدد سطور اكتر من غير اي مفهوم واسلوبكم كله لف ودوران عامل زي حاوريني يا كيكه وهدفكم زي لعبه صلح, ولعبه صلح واحد مدي ضهره والباقي وراه, واحد منهم يضرب والغلبان اللي انضرب يحاول ان يقول مين, واللي كلهم وراه رسمين البراءه علي وجوههم, ويفضل ينضرب لحد مايعرف…. أو ياساتر لو حد ضرب جامد قلبت نكد.
ده غير يايى علي خناقاتكم حاجه يايى خالص كلها كلام يايى والفاظ وصوابع وايدين ورجلين وحاجات كده اسمها سنجه ومطوه وآلي حاجه صعب خالص مش عارفه ازاي مش شايف انهم شمحطجيه معندهمش اي مفهوميه ولا تمييز.. دماغهم مشغوله بمصالحهم فقط واللي علي هواهم واللي مش عاجبه منهم يدمروه.
وقفتهم علي النواصي وفي الاماكن الضعيفه الغلبانه يطالبوا ويتحكموا في الناس بالعافيه آل يعني بيحموهم وياخدوا بالهم منهم وده غير محاولات ان يصاحبوا شلتنا اللي رفضاهم ومش عاوزه تعرفهم اصلا وعاوزاهم يفهموا انهم غلط او يلموا بعضهم في ركنه ومايؤذوش حد, بس دول شله لا تكل ولا تهمد ياحرام مثابره للخروج للشمس وانها تقب علي وش الارض لآخر قطره دم .
بأي أسلوب ولا طريقه مش فارئه, المهم اوصل اللي انا عايزه علي حساب مين او ايه مش بالضروره افكر.. غايتي تبرر الوسيله.
صحيح الشله مانكِرش منظمه مترابطه ولائها قوي بينهم وبين بعضهم, بس للأسف غير حضاريه ومن غير تجارب, من غير ثقافه اجتماعيه, فرق الثقافه زي الشرق والغرب.
هم في زمن النواصي والقهاوي واحنا كافيه وويرليس وآيباد.. تركيزهم علي الكم للغي الدماغ والانقياد علشان كده شلتكم كلها غلبانه فيها جهل مع مثقفين يستعملوا ثقافتهم في تدمير عقول الغلابه لمصالحهم.
علي فكره يا صاحبي مش مشكلتنا ان إحنا اتولدنا كده واهلنا ربونا كده وان ظروفنا جمعتنا بتلقائية مع بعض وان شلتنا فاهمه كويس اللي بيجري وحزينة عليكم ونفسها انتم كمان تفهموا صح.
اصل الموضوع تفاوت ثقافى طبقي, ومحاولة كبير الشله انه يوصل لشلتنا ويندمج فيها معرفش, فبدأ انه يتعامل باساليب كثيره بائسه ومستنكره مع العلم انه لو كان ثقف نفسه بجد وبعد عن الوصوليه والحقد والغل اللي جواه كان دخل شلتنا بسهوله.
علي فكره يا صاحبي احنا ناس فطريه بسيطه ماعندناش غل ولا حقد وسؤ نيه, ناس لطيفه عايشه في تجانس وهدوء, اصحاب مع بعض كل واحد في حاله وحياته ولكن وقت الجد نتلم في ثانيه ولو في آخر الدنيا, مش علشان
احنا شمحطجيه ولا بتوع نواصي لأ.. لأننا علي حق….. ونعرف يعني ايه صح وغلط بجد واصول وادب وعادات وتقاليد وسيب الدين علي جنب لأنه معتقدات وهي شخصيه لا أنا ولا إنت لينا الحق في المحاسبه لانت تحاسبني ولا انا احاسبك. سيبها لخالقنا.
واكيد الخوف من ربنا جوانا كلنا له ايد في تصرفاتنا وافعالنا بس دي روحانيات لا دخل لأي حد في فرض رأيه فيها لأنها اعتقادات شخصيه.. فخلي الدين علي جنب بلاش ندخله في المعاملات والصحوبيه .. ماشي!!
ياصاحب مالك فاتح بقك ليه كإني باكلم بلغه المريخ.. فوق وإصحي عاوز تفضل صاحبي فكر وإعرف وراجع نفسك, مش عاوز, لم نفسك وروح لشلتك ووظيفتك و حالك….
خلص الكلام