في يوم ميلادها آبلة فضيلة

يا ولاد يا ولااااااااااااااااااااااد
إيه إيه إيه ؟؟
تعالوا معانا
ليه ليه ليه ؟؟
علشان نسمع ابلة فضيلة راح تحكي لنا حكاية جميلة
هتسلينا وتوعينا
وتنادي كمان أسامينا
أبلة .. أبلة فضيييييييلة
مين فينا ما بتسريش في جسمه رعشة لما بيسمع الأغنية دي حتى لو كان عنده خمسين سنة ؟؟
مين فينا مش فاكر لما كان بيستنى الساعة 10 إلا عشرة بفروغ الصبر جنب الرادي يستنى الحدوتة بتاعة أبلة فضيلة .. يستنى الغنوة والحدوتة ؟؟
مين فينا ما غناش معاها .. مين فينا ما فرحش لما سمع في يوم اسمه الأولاني بصوت أبلة فضيلة ؟؟
***
أبلة فضيلة .. الصوت الحنون الدافي .. اللي بيطلع بيك سابع سما ويرسم لك الحواديت..
تحس ان صوتها فيه مليون صورة بتترسم .. بترسم ورود وبنت وولد
وقصر الأميرة والملوك والشحاتين بتحس انك شايف وحاسس وعايش الحدوتة بكل تفاصيلها..
اليوم ذكرى الميلاد ال 88 للإذاعية الكبيرة و القديرة فضيلة توفيق الشهيرة بأبلة فضيلة ،، تُعد أشهر من قدم برامج الأطفال فى الإذاعة المصرية و تتلمذت على يد الإذاعى العملاق بابا شارو ،، تخرجت من كلية الحقوق و عملت بالمُحاماة لمدة 3 سنوات ثم تقدمت لإمتحان الإذاعة و نجحت بإمتياز و كان ترتيبها الأول فتركت المُحاماة و تفرغت للعمل الإذاعى .. و جديراً بالذكر أنها الشقيقة الكُبرى للفنانة الكبيرة و القديرة و عملاقة المسرح المصرى مُحسنة توفيق ،، التركية الوالدة و المصرية الوالد ،، بنت حى الأزبكية ولدت بمُحافظة القاهرة ،، 4 / 4 / 1929م