فاكرين طارق وقصة ضحكته الحلوة الرايقة اللى حببت فيه كل الناس اللى كتبناها فى أبريل الماضى

النهاردة وقبل نهاية اليوم فى 57357 ، شاهدت والد طارق ووالدته وأخته بيحضنوا طارق وبيبكوا بدموع الفرح، وطارق بيقول الحمد لله أنا مش مصدق نفسى أنا خلاص خفيت ونتيجة الرنين أثبتت النهاردة أنى خلاص بقيت كويس، والدكتور قالى هاتبدأ فترة المتابعة، هم كبير وانزاح من على قلبى، افرحى يا ماما انتى وبابا من قلبكم خلاص مش هاتتعبوا تانى وتيجوا وتروحوا بيا كل يوم ولا هاتفضلوا سهرانين جنبى لأنى خلاص من النهاردة هارجع لحياتى من تانى، أنا انتصرت على السرطان، أنا أقوى من السرطان.
دى كانت كلمات طارق قالها وهو بيحضن والدته وأخته وفى عيونهم دموع الفرح.
والدة طارق، قالت: المستشفى بفضل ربنا ردوا لنا روحنا تانى مش عارفين نشكركم إزاى، طارق رجع زى الأول الحمد لله، ابنى بطل صبر وانتصر على السرطان بفضل ربنا، وبفضل المستشفى، والدكاترة والممرضين والرعاية اللى بيلاقيها هنا وفى فرع طنطا.
عقبال كل الأطفال يارب لما يفرحوا بالشفاء، ويفرحوا أمهاتهم، زى ما فرحنا النهاردة بابنى طارق.
بنقول لكل القلوب المليانة بالخير اللى واقفين جنب ولادنا.. هى دى صدقتك الجارية.. وهى دى الكفالة اللى ساعدتنا بيها.. وهى دى الرسالة اللى بعتهالنا من موبايلك لرقم 57357.. فرحة طارق النهاردة هى نتيجة لكل إيد اتمدت بالخيرعلشان تساهم فى رحلة شفاء أطفالنا.
طارق وغيره كتير بيفرحوا ويرجعوا لحياتهم من تانى.. ولسه فيه كتير من أطفالنا منتظرين الفرحة بإذن الله وبمساعدتكم
مستشفى 57357.. رحلة علم هدفها الحياة
اقرأ قصة رحلة شفاء طارق منذ البداية
طارق أحد أطفالنا فى 57357 ضحكته و حالته النفسية حققت بفضل الله معجزة فى تقدم حالته و قرب تحقيق حلم الشفاء
طارق : باحب فرع طنطا قوى لأنه رايق و باعرف اكتب مذكراتى فيه عن كل الحاجات الجميلة اللى بيعملوها معايا
باقول لكل الناس اللى بتتبرع علشان أتعالج كويس و أخف باقولهم شكرا ليكم لأنكم بتساعدونى انتصر على السرطان .
طارق (10 سنوات) صاحب أجمل ضحكة و ابتسامة مشرقة تعطى لمن يراه الأمل فى كل شئ كان فى حديقة المستشفى مع والد ووالدته يحضر مهرجان شخصيات الافلام الكارتون جلس مستمتعا بمتابعة الالعاب و الشخصيات, هو من بنها و له 3 أشقاء الاب مهندس و الام مدرسة
بداية الإصابة و اكتشاف المرض و دخوله 57357:
فى شهر مايو تحكى والدة طارق أنه تعرض لحالة من القئ المتكرر و تم عرضه على العديد من الاطباء و منهم طبيب مخ و اعصاب الذى اكتشف من خلال الاشعة انه يعانى من ورم و مياه على المخ , و تكمل والدة طارق " ساعتها جينا على طول على 57357 قالوا لنا طارق هايتحط على قائمة الانتظار علشان مافيش اماكن و فعلا انتظرنا اسبوعين و دخل فى شهر يوليو و عمل عملية سحب المياه و بعدها بشهر تم عمل عملية لأخذ عينة و قرر الدكتور ياسر يوسف طبيبه المعالج أنه ياخد 31 جلسه إشعاعى و 12 جلسه كيماوى.
فرع طنطا ريحنا ووفر علينا مشاوير كتيرة و تعب:
و تستكمل والدة طارق " احنا دلوقتى خلصنا الاشعاعى و الحمد لله و بناخد الكيماوى فى طنطا الفرع دا ريحنا و قرب المسافة علينا قوى لأننا من بنها بناخد وقت قصير و نوصل و طارق ياخد الجرعة و هو مرتاح مش تعبان من المواصلات, و الحمد لله المعاملة هناك كويسة من الكل و المكان هادى و جميل.
خبر زى المعجزة و فرحة كبيرة :
تحكى والدة طارق وسط دموع الفرحة انه و منذ اسبوع قام طارق بعمل تحاليل و اشعات معتادة لمتابعة الاطباء و قابلنا دكتور ياسر و لقيته بيقول ان الورم اللى فى مخ طارق بالعلاج تم تحجيمه بنسبة 75% و الحمدلله و هايبقى فاضل له جلستين كيماوى و يعمل مسح ذرى و بعدها هايبدأ متابعة بإذن الله, طارق من ساعة ما عرف بقى فرحان أكتر و قالى انا فرحان يا ماما و هاكمل و انا مش خايف و حالتى هاتبقى أحسن و أحسن بإذن الله.
مذكرات طارق من 57357 طنطا:
و تحدث طارق قائلاً أنا باحب قوى دكتور ياسر و دكتور البلتاجى و بحب اكتر فى فرع طنطا ميس ميرفت و مستر هشام من التمريض علشان بيهزروا معايا دائما و بيضحكونى كل لما باروح اخد الجرعة بابقى فرحان علشان هاشوفهم و باكتب كل مرة مذكراتى و المواقف اللى بيعملوها معايا و ضحكتنى, انا باقول لكل الناس اللى بتتبرع علشان أتعالج كويس و أخف باقولهم شكرا ليكم لأنكم بتساعدونى انتصر على السرطان .
سألنا طارق نفسك تطلع ايه لما تكبر قال :" نفسى أطلع لاعب كورة فى النادى الاهلى"
طارق حكاية كلها أمل بطلها الراحة النفسية اللى بيشعر بها الطفل فى المستشفى اللى بتهيئ له كل المناخ المناسب ليكون اكثر راحة و بالتالى يؤثر ذلك ايجابيا بإذن الله على استجابة أطفالنا للعلاج ...57357 بتقدم أفضل رعاية و علاج بالمجان لأطفالنا من مصر و الوطن العربى و بتسعى فى سبيل ذلك باستمرار تعليم و تدريب الكوادر الطبية المتخصصة و تبادل العلم و المعرفة بين المستشفى و أكبر المراكز البحثية و الطبية فى أوروبا و أمريكا