مصر فرحانة

فى لحظة استرخاء قلت لنفسى بدهاء «ليس من الذكاء أن تكتب عن الاستفتاء، فالكل سيكتب عنه صغيرا وكبيرا.. وأى حد حيكتب أحسن منك بكتير، فالدخول فى منافسة مع المحترفين المتفرغين والمتمرسين هو عين الغباء».. وفعلاً أنجزت موضوعاً بعنوان «فوازير زير زير».. لكن ظهيرة يوم الثلاثاء حلمت، خير اللهم أجعله خير، حلمت بإيه؟!.. بالاستفتاء.. آل إيه؟!.. اللجان فاضية خالص.. مافيهاش حد خالص.. والشوارع ماشى فيها ملثمين.. مش معروف همه مين.. بس بالآلى مسلحين.. والشوارع فاضيه خالص.. والبيوت مقفلة.. والمحلات متقفلة.. والدنيا هُس هُس.. مالهاش أى حِس.. واللجان فاضيه خالص.
صحيت مالنوم كما المجنون.. جريت عالريموت وفتحت التليفزيون.. شفت اللجان عمرانة بالطوابير.. دموع الفرحة فوق البسمة سالت.. وقالت.. الحمد لله مصر لسه بخير.. شفت الفرحة بتنط مالعيون.. بترقَّص التليفزيون.. وافتكرت جملة شكسبير «أكون أو لا أكون».. وفجأه دمى فار.. وقلبى ولع نار.. قلتلهم صح لازم آخد القرار.. أقوم من خمولى.. وأنزل وأقوم بدورى.. وأشرَّف صباعى الصغير بالحبر الفوسفورى.. وبعد ما استفتيت.. رجعت عالبيت.. وفتحت آيبادى.. وكتبت.. الله عليكى يا بلادى.
الله عليكى لما / إتلموا عليكى لمة
ولادك اللى همه / بيعشقوكى يامه
الله الله الله الله / شالوكى فوق كتافهم
لفوا بيكى اللجان / والكون بعيونه شافهم
بيقولوا للزماااان / الله الله الله الله
إحنا خدنا قرارنا / ماحنا أصحاب القرار
نعم ليكى اختيارنا / ونِعمَ الاختيااااااااار
الله الله الله الله
سجل يا تاريخ وقول / من أشرف نافذة
اللى حصل مهووول / وحقيقى معجزة
الله الله الله الله / نزلنا بالملايين
نقول لمصرنا / إن إحنا مصممين
نحسم أمرنا / الله الله الله الله
وقفنا فى الطوابير / مش سكر وزيت
دا عشان بكره يصير / خير فى كل بيت
الله الله الله الله / نعم قلناها حق
بالفطرة وبالحساب / نعم معناها لأ
للخسة.. والإرهاب / الله الله الله الله
■ ■ ■
مبرووووك
■ ■ ■
بدأتها فى 30/6/2013م.. كملتها فى 3/7/2013م.. ومش عارف ليه ما قلتهاش فى أى برنامج.. وما نشرتهاش فى أى مكان.. بس نفسى بجد أقولها الآن..
ونفسى كمان.. قبل ما أقول مبروك.. أقول مافيش ورد من غير شوك.. وعلى سبيل المثال لا الحصر.. وعشان خاطرك يا مصر (1- كنت أتمنى أن تكون نسبة المشاركة أكبر وأعظم رغم أنها أعلى نسبة فى كل الاستفتاءات.
2- نسبة مشاركة الشباب موضوع يستحق الدراسة.
3- للى بإذن الله حيحكمونا.. اوعوا تخذلونا).
(ملحوظة: نسبة المشاركة فى بيتى.. أنا ومراتى وبناتى وجوز بنتى وحماتى 100x100 هههههههههههههههههههههه).
مبروووووك
4/7/2013م
مبروك يا أعظم شعب / مبروك يا أجدع ناس
ياللى رعبتوا الرعب / وأسستوا الأسااااس
لبكره اللى مستنى / يجيلكوا ويهنى
وهوه بيغنى: إمبارح راح خلاص
ملهوف ومتشوق / وجى متذوق
ونفسى أتروق / بالحب والإخلاص
شدوا الهمم شدوا / مدوا الخطى مدوا
أملى العظيم بدو / تبنوا بكل حماس
ابنونى لولادكم / وكمان لأحفادكم
وسطروا أمجادكم / بالدهب والماس
دا انتوا أعظم شعب / وانتوا أجدع نااااس
_______
أنا يا مصر بُكراكى / وقداامك.. وورااكى
أنا ثورة محاوطاكى / بالأمل.. وبالمنى
يالاااا.. نخطى الصعب / ونعاهد بعضنا
إيدينا فى إيدين بعض / ونبدأ فى البنا
يالااااا.. يا أعظم شعب / يالااااا.. يا أجدع ناس
■ ■ ■
أنا اللى فى لحظة يأس قلتلها: «ومتسأليش يا مصر ليه النوم اليوم أضمن وأسلم.. وماتحلميش بأى شىء وأنا أيضاً مش ناوى أحلم.. يالا تصبحى على إيه؟! الله أعلم الله أعلم».. وقلتلها كمان: «حتى أحلامى بدأت تحس.. وكل يوم عن يوم تخس.. مافاضلش غير حلم واحد.. مالوش ملامح ولا لون ولا حس».. تقريباً معظم اللى قلته بعد ثورة يناير بشهور وبالذات بعد العيَّاط.. كان مليان يأس وأسى وتشاؤم وإحباط.. النهارده بعد إذنكم حاسس إنى متفائل ونفسى تشاركونى كلكم فى هذا التفاؤل ونقول كلنا مع بعضنا:
مصر فرحاااااااااااااااانة
■ ■ ■
مصر فرحانة
«3/7/2013م - 16/1/2014م»
مصر فرحانة.. فرحانة / مصر النهارده.. فرحانة
نيلها بيغنيلها.. وليلها / نوَّر.. وجه يرقص ويانا
مصر فرحانة فرحانة / مصر فرحانة فرحانة
الله عليكو يا مصريين / الله عليكووو
الدنيا وانتوا فرحانين / فرحانة بيكو
وأحلى حاجة يا أهلى فيكو / اللى فى قلوبكم فى عينيكو
ومصر فرحانة فرحانة / مصر النهارده فرحانة
الفرحة الليلة.. ليها طعم تانى / ليلة جميلة وزى الفل
بالزغارييييط.. والأمااااانى / الكل بيباااااارك للكل
وبيغنواااا لست الكل / مصر فرحانة.. فرحانة
مصر النهارده.. فرحانة / مصر فرحانة بشموخها
مصر فرحانة بشيوخها / مصر فرحانة بأمجادها
مصر فرحانة بأحفادها / مصر فرحانة.. ببناتها
وبشبابها.. وبستاتها / وفخورة جداً.. بزهورها
مصر فرحانة بدستورها / مصر فرحانة بدستورها
حاسه إنه.. حينورها / ويعيِّشها فى أجمل عصر
مصر فرحانة إنها مصر / مصر فرحانه إنها مصر..
بس ياريت ما تكونش الفرحة نسِّتكم تقرأونى بالعامية المصرية المعروفة. متعاصة بالفصحى السهلة المألوفة.. وإلى أن نلتقى مرة أخرى.. فى فرحة أخرى.. وربنا يكتر أفراحنا.. ويسعد بيها أرواحنا.. إليكم أطيب أمانى قلبى وتحياته والسلام عليكم ورحمة الله وبركاته.