إلى من يهمه الأمر

إلى الطفل اللى كان يفرح بلعبة و بس
و راسم كل أحلامه فى صوت كرتون
بيستنى ميعاد عرضه على الشاشه
و يزعل لو فى يوم ما يجيش
*************
عن الطفل اللى كان حبه معاه فى الفصل
و شايل جوه مريلته جواب ليها
كاتب انها اجمل بنات الفصل
و أشطر واحده من سِنه و حافظه الدرس
كان بيحب مَدرسته
لكن يكره يقوم بدرى
و كان دايما يكون هو رئيس الفصل
**********
كان نِفسه يكون ظابط
و دايما عيده يشترى بيه
مسدس صوت و واحد رش
و كان والده يقوله يا بيه
و يرفعله سلام ثابت
تحيه لحضره الظابط
لكن فجأه الامل ما كملش
كبر ابنه و عرف انه
بدون الواسطه
مالهوش بخت
********
و كَمل حلم مش حلمه
عشان حلمه مِسك فى ايدين
شبح تايه ما بيهزرش
و فوق أحزانه بيسرفل
عشم أهله فى يوم ما حصلش
***********
الى الشاب اللى من جيلى
و لسه عنيه بيدعكها من الخضه
عشان فتح لقى ثورات
بتكسر سور نظام بهتان
و صاحبه اللى قال لأه
وكان بيقاسمه ايجار الشهر فى الشقه
بقى فجأه من الاموات
و شاف نفسه فى لحظه هلاك
كما العيل فى غمضة عين
لقى سِنه بيتمرجح على الستين
************
و لسه يدوب بيتنهد
عشان يبدأ يشوف حق اللى مات غلبان
لا عاش عُمره و لا خد منه غير موتة
لكن جايز بتفتحله بيبان تانيه
على الجنه
و تكتبله يكون كسبان
صحيح اسمه قتيل محروم من الدنيا
و فى الجنه شهيد فرحان
لقى نفسه ما بين شكلين
لكن منه
واحد منهم بيرسمله حياه حلوه
و بالالوان
و أما التانى مش شايف حياه أصلا
و بيكَسرطموحه العالى
بالاحزان
************
الشاعره/سهام سامى