و تحيا مصر

يا مصري لو قادت صوابع مصر شمع
يقولوا خاينة عايزة تحرق العرب!!
و لو روينا أرض العرب بالدم
يقولوا إلحق راح تِغرَق العرب
الخاينة مصر!!
مصر؟؟؟؟؟!!!!!!
مصر اللي عاشت غُرة في جبين الأمم
هامتها عالية و عمرها عمر الهرم
أرض الشجاعة و الكرامة والكرم
ييجي عليها اليوم و تصبح متهم؟؟
لااااااااااا ....إلا مصر.
مصر كانت دولة من كذا ألف عام
لما كان الكون بيحبي في الظلام
كان مصر دولة بيحكمها قانون و نظام
وجيشها واحد مش كتائب و فصائل و انقسام
ده الوِحدة مصر
مصر جيشها وشعبها و علمها واحد
موقفها واضح لا تنافق ولا تزايد
بتنصر المظلوم و لا تقبل تحايد
في الحرب و السلم دايما دورها رائد
دورها ..مصر !!
مصر العظيمة تضمنا في نسيج متين
تنسجنا لوحة خيوطها أقباط مسلمين
لا ندين لغير الله و لفضلها حافظين
مهما افترقنا في أي محنة لحضنها راجعين
للأم مصر
عٍدوا شهداءنا بألوف مش بالمئات
و اسألوا أهل القنال تحت الغارات
طول سنين الحرب عاشوا في الشتات
تشهد قبور شهداءنا في أرض العرب
و في أرض مصر
أرض القنال شهدت جحافل نازحين
فوقهم غارات و الأرض ألغام مزروعين
كل عيلة فيها شهدا و مفقودين
والرجال في النكسة عاشوا مكسورين
تحلم بنصر
مين للأشقا المصريين رفعوا علمهم؟
ولأهل سينا و القنال فتحوا حدودهم؟
واسوا ضحايا الحرب أو نشروا صورهم؟
و لا كام مظاهرة خارجة في بلاد العرب
هتفت لمصر؟
كام جندي فيكوا يا عرب حارب حروبنا
و ازاي شعوبكم وقتها شاركت مصابنا
أو بعتوا بترولكم و سددتم ديوننا
غير بس حكام معدودين ساندوا صفوفنا
و صف مصر!!
إعلامكوا كان فين في أيام الإحتلال
مين فيكوا ندد بالمجازر و القتال؟
لما كان الظلم فوق الإحتمال
لما قلتوا النصر طبعا شئ محال
هتنوله مصر!!
بس جيل النكسة حلفوا ياخدوا تارنا
بعد ست سنين هزيمة انتصرنا
ابتدينا و بعد ست ساعات عبرنا
وساعتها قلتوا ده انتصار كل العرب
مش بس مصر!!
لو مصر فازت يبقى طبعا نصركم
حتى لو كان التمن من دمنا مش دمكم
لو حتى ضعنا كلنا ..اية يهمكم؟
بالروح و الدم نفدي بترول العرب
من دم مصر
من بعد أكتوبر و رد الإعتبار
عدنا لقينا أرضنا صبحت دمار
محتاجة جهد و مال لتحقيق العمار
أصبح سلام المنتصر أفضل خيار
تختاره مصر
اية الغريب بالقوة ناخد أرضنا
ونتقي بالسلم شر عدونا؟
نحفظ حدودنا خط أحمر عندنا
من أي طيش ممكن يهدد أمننا
أو أمن مصر؟
ليه العرب مستغربين نبني في بلدنا
ياما بلادهم عمرتها ايدين ولادنا
شوف كام مهندس منا خلوا الصحرا جنة؟
وتشهد مدارسهم بفضل مدرسينا
وفضل مصر
ليه العرب مستكترين نعيش في عزة؟
قاعدين يجرونا بدعاوي مستفزة
مرة الكويت مرة العراق و مرة غزة
عايزين يحاربوا بعضهم في كل نزوة
بجند مصر
لازم نعود للحرب تاني عشان نموت؟
ويعيش شيوخهم في القصور مش في البيوت
يملوا الخليج العربي من أحلى اليخوت
ولو ننهزم يتشفوا و يقولوا السبب
برضه مصر!!
مين فيكوا رجع كل شبر في أرضه ضاع؟
مين فيكوا حارب زينا طول الصراع
لا اخترتوا حرب و لا سلام ده انتوا في ضياع
أرواحكوا غالية عندكوا أما المشاع
دول جند مصر
الشجب و التهديد عليكوا أما الموت علينا
عيشوا في عزة و رغد أما الذل لينا
وبيعوا غزة و الجولان و تعالوا سينا
ولو اعترضنا يبقى العار علينا
و عيب يا مصر
مصر ماتت قال و اعلنتم وفاتها بكل نشوة
مصر باقية و انتوا ماتت في قلوبكم كل نخوة
مات شعوركم بالكرامة و العروبة و الأخوة
حتى اعلامكم نفاق و رياء و فتوى
ضد مصر!!
دول كثيرة دعت لقمة مصغرة
كلمات كبيرة و خُطب هزيلة مكررة
لا أخدتوا موقف و لا وقفتوا المجزرة
و هتفتوا كالعادة بأصوات منكرة
تلعن في مصر
وكأن مصر عدوكم مش اسرائيل
و كأن أصبح طبعكم نكر الجميل
بعتوا شعوبكم للعدو بثمن هزيل
قصوركم في تل أبيب هناك أكبر دليل
براءة لمصر
فاوضوا و ساوموا في الخفا و داروا رؤوسكم
في بنوك سويسرا و اسرائيل نموا فلوسكم
ساندوا المقاومة بالخطب قدام شعوبكم
ومسيرها تكشف كدبكوا فموتوا بغيظكم
و انسوا مصر
عجبي على شعوب عايشة تنادي بالقتال
أراضيها محتلة و حكامها بتشجب الأحتلال
فيها قواعد أجنبية و عندها بترول و مال
منها دويلة صوتها عالي في الجدال
و في سب مصر
اتقوا الله في شعوبكم و الوطن
و استعدوا للمعارك و المحن
بالصلاة و الصبر و الجيش و المؤن
ده الرسول قال اعقلوها و اتقوا شر الفتن
تحظوا بنصر
رغم الإهانة يا عرب مصر صامدة ع الطريق
توفي عهودها تصون حدودها من العدو زي الصديق
هي الكبيرة قدرها تحتمل الشقيق
بس بحدود بدون تطاول لا يليق
بقدر مصر
و في كل محنة مصر هتكون المدد
باقية كموج البحر و انتوا كالزبد
تحيا الحضارة فيها خالدة للابد
يحيا الهرم و النيل و أولاد البلد
و تحيا مصر