أقوى من الموت

وكأني بسرفل ديل العمر
علشان ما يكرّش قدّامي
أو برفي الفتق اللي مصمم
يكبر ويزيد
وكأني بعيد
تفاصيلي وبتحدى الأيام
منا شايفه عيون مليانه كلام
بصّالي وسرحانه ف ضلّي
تترجى العمر اللي فاضلّي
يمتد لأخر نقطة
ف أخر سطر
ف حضن الكون
وكأن عليها العمر يهون
وانا عمري ما اهون
شايفاهم كما أطفال ماسكه
جلبية أم ف قلب السوق
خايفين ليتوهو مع الزحمه
وكأن الجلبيه أمانهم
ودليلهم ف كتاب الأيام
وكأني ف قلب الحلقه إمام
حواليه مريدين
وهناك ع الباب
دراويش واقفين
تدعيله ف كل صلاه بالعمر
وبشوف النور من قلبي يمر
ويملّس على راس الأيام
ف تزيد بركه
واكمنّي مانيش قادره الحركه
بتسنّد على كتف النظرات
وبنادي القوّه من الرحمن
جايز علشان
مش عايزه دموع تملا عيونم
ف بحاول إنّي أكون بينهم
على مر اليوم
وبحاول أمسح أي غيوم
ممكن تتسرسب ع الخدين
مقسومه اتنين
الأول .. معجون بالأنّات
والنص التاني بيتحدّى
ويحاول ف السكّه يكمّل
وكأني بسرفل ديل العمر
وبعيد تفاصيلي من الأول
على لوحه من الورق البردي
برسم صورتي
برسمني إيزيس
وادخل ف كتاب الأسطوره
أزرع ف ضلام الليل فوانيس
وارسمني هاميس
بالطرحه البيضا وف الزفه
مع حابي عريس
واتدارى ساعات
خلف الكواليس
علشان الكحل اللي ف عيني
من دمعتي باش
ف بحاول إنّي أكون أجمل
وبداري الأحزان على وشّي
بشوية بودره مع المكياج
ودا كله عشان
قدّامي عيون مليانه كلام
بصّالي وسرحانه ف ضلّي
تترجى العمر اللي فاضلّي
يمتد لأخر نقطة
ف أخر سطر
ف حضن الكون
وعشانهم بس ياقلبي بكون
أقوى من الموت