قصيدة ... مسرح العرايس

عايشين في مسرح عرايس
متحركة بخيوط
مسكاها ايد اخطبوط
بتحركها في الظلام
في لعبه خرسه بدون كلام
الكل فيها بيشارك
ساعات بيتفرج
وساعات في العتمه يتعارك
_
دور يا تور ف الساقية
اطحن غلال المر
و اطحن بن القهاوي
يمكن تطرح غناوي
ما انت ف الاصل فقري
ودايما للفقر غاوي
_
و يا نوح
متبعتش تاني حمام
الحمام معادتش يعرف
بحر الدم جف
ولا الطوفان باقي
_
متبعتش تاني حمام
برج الحمام اتنقب
والغيه منهوبه
والكفه مقلوبة
والسوس بينخر ف الصدور
خيال المقاته واقف
ف الارض القديمة البور
بيخوف الولاد الصغار
و يتحكم ف النسور
والجنايني مريح الجته
تحت تعريشه العنب
ماسك ف ايده منشه
بيرحل العزال ع القبور
_ فمتزعليش يا اما
لو قالوا مات بالقهر
ولا تندبيش يا أما
لو قالوا مات بالغدر
وادعيلي ف ليله القدر
الملم العضم المرمي
فوق ارض الجناين
واسد مجري الدم
اللي فتحه الخاين
واخد بتار اخويه
اللي اتقتل قدامي
ولاجل اني ما اشوفه
لحموا لساني وغموني
ادعيلي يا أما
مبتش خاين
ادعيلي يا اما
مبتش تاني مداين