أحمد حلمى .... النجاح لا يأتى صدفة

تفتكر ايه هو سر نجاح أحمد حلمى ؟
أرجوك بلاش تقولى الحظ والصدفة والكلام الطيب ده أصل أنا عارف وحضرتك عارف والكل عارف ان الحظ ممكن يساندك مرة والصدفة جايز تنفعك مرتين تلاتة لكن كل مرة طبعا مسألة صعبة ومفيش حد فى العالم ممكن يلاقى كل الحظ ده حتى لو كان أكتر واحد محظوظ فى العالم
أعتقد ان سر نجاح أحمد حلمى هو اجتهاده وقدرته على قراءة عقلية الجمهور ومعرفة مش بس الناس عاوزة ايه وبتحلم تشوفه بل ازاى أقدر اقدم ده وبطريقة احترافية طريقة بسيطة وسهلة بدون فلسفة مفتعلة
واحمد حلمى شاطر قوى فى المنطقة دى
وعشان كده أفلامه بتنجح وبيعشقها الكبار والصغار على اختلاف ميولهم وأفكارهم
فى ميدو مشاكل اختار بداية صح فيلم كوميدى خفيف يحمل رسالة بسيطة ان الدنيا ممكن تكون مرحة ولذيذة بس برضه محتاجة فى أوقات كتيرة شوية جد أما فى اسف على الازعاج قدم فكرة رائعة فيها شئ من الفلسفة بس فلسفة بسيطة محببة الى نفوس الجميع وقادر على استيعابها الكل دون جهد وعناء فلسفة فيها بعض الغموض المبسط من اجل الاحتفاظ بعوامل التشويق والاثارة حتى تكتمل عناصر الفيلم وتصل الرسالة التى يحملها بين مشاهده
احمد حلمى عنده ميزة رائعة انه لا يكرر نفسه ولا يحصر موهبته فى برواز او قالب معين قادر على التنويع والتغير حتى يتمكن من ملاحقة جمهوره بما يريد حتى يحافظ على نجوميته من اجل هذا هو يهتم بتفاصيل عمله ويركز جدا فيما يفعل ويخطط جيداً لخطواته قبل ان يخطوها ولا يعتمد على نجاحات سابقة حتى لو كانت كثيرة ومن النوع الساحق
لهذه الاسباب نجحت افلامه التى قدمها وستنجح افلامه القادمة لو حافظ على الطريقة التى يتعامل بها مع مشواره الفنى
مش قلت لكم النجاح لا يأتى بالصدفة وان جاء مرة فالصدفة صعب أن تتكرر
أحمد صلاح محمود
ahmedsalah124@yahoo.com