حبة رمل من أرض بلدنا

علشان الكلام الحر كان زمان ممنوع
واللسان الحر كمان كان مقطوع
طلعة حباية رمل تتفجر من قلب الينبوع
طلعة تحكي حكايتها أيوه حكايتها
من يوم مولدها لحد مماتها
هي الرمله ياناس بتموت
دي حبايه من أرض بلادي
مش حبايه ف شجرة توت
حباية الرمل ياناس أنصبغت
أنصبغت كل الألوان
أبيض أخضر أحمر أسود
أنصبغت كلها أحزان
حباية رمل من قاع النيل
من طمي الأرض العطشانه
من قلب الفلاح المصري
مسروقه منه ف نص الليل
جايه تقول حكايتها
لكل ولاد الضاد م النيل
جايه لدجله جايه لبردي
جايه لكل أخوات النيل
وأنت كمان أشهد يافرات
ضحكه وجوه الضحكه أهات
أه للخضره أه للميه أه للصحرا
أرض بلادي دي غاليه عليا
حتي أن كانت الأرض واحات
مصر الحره الحلوه المره
الكادحه العرقانه أم الأرض العطشانه
أم الولاد الشقيانه
أم الشهدا القلقانه التعبانه
حتي ف نومها هناك ف القبر
أياك تنسي ف بلدنا هناك زرعنا الصبر
بس خساره شفت نداله
شايف علني مزاد ودلاله
هيصه ولمه وفيها قواله
مؤامره دنيئه
علي بيع هدمة أمي الباليه
علي بيع صيغة أمي الغاليه
علي بيع ارض أجدادي العاليه
شايف مصر
شايف مصر ضحيه بريئه كلها أحزان
شايف مصر لقمه هنيه تاكلها غيلان
شايف الحلوه ف قلب الميه
تغرق تنزل فاكره جوا الميه أمان
لا جوا الميه كلاب البحر
تاكل تنهش تزلط تبلع
فعلا جوا الميه حيتان
شايف مصر
شايف مصر قتيله قدامي
بس لأمتي يامصر تنامي
لما يجيلك الفاسق الدامي
ويهتك فيكي عرض إعمامي
خايف مصر خايف مصر
ياحلوه ياعايقه يارايقه هناك
تحت التربيعه تروح منك
أحلي معاني كلمة مصر
أصحي يامصر أصحي يامصر
مع تحيات صعلوك في شارع الملوك الشاعر / نبيل عبد العزيز