مشاكل الأفلام الأجنبي ( مقال مش ساخر )

مين فينا ماشفش فيلم أجنبي ؟
مين فينا ماعندوش دِش و بيتفرج بالساعات علي MBC 2 ؟
للأسف رغم إن الأفلام الأجنبي بتمثل نسبة ترفية كبيرة للمصريين - بجوار قناة التيت و الرقص الشرقي !- إلا إن الأفلام الأجنبي ليها تأثير كبير جداً علي المصريين - المصريين بالذات -
(1) الأفلام الأكشن .. من كتر الدم و القتل اللي فيها ، خلا المناظر دي بالنسبة لنا في الحقيقة مش مهمة .. عادية جداً .. لو أنت ماشي في الشارع و عربية خبطت واحد و حدفتة متريين بعيد .. أنت مش هتجري علية عشان تنقذوا .. أنت هتعض علي الرصيف فطصان من الضحك .
(2) الأفلام الرومانسية .. فهمتنا أن أي قصة حب .. آخرها ورقتين عرفي أو تخلف عيل و يتاخد منك و ماتشوفوش تاني أو أنك تموت بالإيدز .
(3) الأفلام الكوميدية .. فهمتنا أن أي واحد معاة فلوس و كتب نكتتين ممكن يعمل فيلم كوميدي ( مش مصدقني ؟ أتفرج علي أي فيلم ل Adam Sandler )
(4) أفلام الحرب .. فهمتنا أن معظم الحروب سببها أن واحدة ست غسيلها نقط علي غسيل جارتها اللي في التالت .
(5) أفلام الكارتون .. فهمتنا أن الأطفال عايشيين في نعمة و أن الدنيا لسة بخير ( عند عمو ديزني بس ) .
(6) أفلام الرعب .. فهمتنا أن كل واحد مننا متجوز Vmpire معاة في الشقة .
(7) الأفلام الكلاسيكية .. فهمتنا أن زمان عشان تكون صايع و واد مخلص .. لازم يكون عندك سوالف أطول من مجدي الجلاد .
كريم محمد
airmaster2011@hotmail.com