كشكول

حتى المعانى باكتشفها من جديد
حتى النشيد بقاله طعم
بقاله لون
حتى العلم
وانا بين لونين اتنين مالهمش تالت
بانتشى بطعم الحياه
وباتولدلك من جديد
وباستهجى الكون معاه
أبيض ضيا عشقك يا يمامة بوح
بتتمايل على جبينك
أحمر دمايا بتجرى ف عروقى
وتكوينك
ومافييش سواد
ليه السواد وانا حنتى كانت يوميها
وكتبتها جمعة رحيل مع إنى حى
ولسه ايدى معلمة
على صفحة الكشكول
كانوا كلمتين اتنين يادوب وحفظتهم
ونقشتهم من أول الكشكول
ولآخر الكشكول بأقول
حريه ....نووووور
وقلب احمر وهبتهولك من زمااان
ماسبتكيش
مين قال مشيت ..!!!
لو خدتى بالك م الكلام
انا قلتهالك من زمان ...منك وليكى
ماشى مطمن عليكى
مع إنى جاى
ماتدمعيش ....
ولا تسمحيش للدمع فعنيكى الجميله
يهزم جناين فرحتك
انا قلتهالك من زمان ...
انا تهمتينى وباختصار
عشق النهار ..وعشقى ليكى