50 % عمال وفلاحين فى مجلسس الشعب!.. كلاكيت أول مرة

العمده أنا عايز السنه دى تزرع لى الفدانيين اللى باقيين نصهم خيار وفلفل والنص الثانى كنتالوب!.. سمعت يا شيخ الغفر..
شيخ الغفر لكن يا عمده دا همّ الفدانيين اللى باقيين مزروعين رز.. والكام فدان اللى كانوا مزروعين شوية قمح وشوية قطن زرعناهم السنه اللى فاتت قرع وبدنجان وكام شتلة منجه!
العمده هو انت هتفضل طول عمرك متخلف يا وله؟!
شيخ الغفر إزاي يا عمده؟!.. همّ مش بيقولوا القمح والقطن محاصيل استراتيجية يا عمده!
العمده جتك نيله يا شيخ الغفر!.. مش بقول لك انت متخلف!.. يا شيخ الغفر القرع والبدنجان بيكسب اكثر من القمح والقطن بتاعك ده!
شيخ الغفر طيب يا عمده واحنا ناكل منين ونلبس منين؟!.. نورنى يا عمده!
العمده ما عنك لا كلت ولا شربت يا وله!.. هو يعنى القطن بيتعمل محشى زي القرع يا وله؟!
شيخ الغفر وهو المحشى ينفع من غير رز يا عمده؟!.. وهي المسقعة هتتاكل من غير عيش يا عمده؟!.. يكونش عايزنا نجوع يا عمده؟!.. ونمشى عرايه؟!
العمده هتفضل طول عمرك حمار يا شيخ الغفر!.. أمال انا عاملك شيخ الغفر ليه؟!
شيخ الغفر ليه يا عمده؟!
العمده لأنك حمار!.. هو انت ما تعرفش؟!.. يا شيخ الغفر احنا بنجيب القمح من أمريكه وبنجيب الرز م الفلبين!.. وبنجيب الحاجات الحلوه اللى بالى بالك من لبنان!.. انت فاكر الشيكولاته الإيكا والكورونا يا وله؟!
شيخ الغفر إيوه يا عمده..
العمده أهو احنا اتنورنا وبأينا نجيبها من بره أشكال والوان! ولو انك مابتعرفش غير البتاو والمش وفحل البصل يا شيخ الغفر!
شيخ الغفر وكبريت الهلب راح فين يا عمده؟!
العمده اتنور بأه يا شيخ الغفر!.. احنا دى الوقت بنجيب كبريت معتبر م السويد رأسا!
شيخ الغفر طيب والهدوم يا عمده؟!..
العمده اللى زيى واللى زيك بنجيب الهدوم من بريطانيه! مع إن الخيش لايق عليك اكثر يا شيخ الغفر!.. واللى زي عيلة أبو سويلم المقشفين بيجيبوا الهدمه م الصين!.. تقدر تقول لى نزرع قطن ليه؟!
شيخ الغفر هو الواد سويلم جاي يرمح زي الحصان كده ليه.. زي ما يكون واخد حباية!
العمده لأ وانت الصادق.. دا واخد فهيمه بنت الشيخ ابراهيم!
سويلم يا خراب بيتك يا سويلم.. إلحقنى يا عمده!.. دارى شايط فيها النار!
أم صابرين إلحق يا عمده!.. الدار اللى جنب دار أبو سويلم مسكت فيها النار!
العمده وعايزينى اعمل إيه؟!.. أروح اطفيهه!.. ماهو أصلكوا بقر!.. ما تروح يا خويا تشتكينى لمجلس الأمن!
بيومى شايف يا عمده.. النار عماله تسرح من دار لدار يا عمده!
شيخ الغفر الحكاية معدتش يسكت عليها يا عمده.. أروح ابلغ المركز؟!
العمده مركز إيه يا شيخ الغفر؟!.. انت عايز المأمور تطلع صورته فى الجرانين واحنا علينا الغضبه؟!
شيخ الغفر وبعدين يا عمده؟!.. دى النار اشتدت أوى يا عمده!.. ما نجيب بقية الغفر يشوفوا لهم حل فى الحريقه دى يا عمده!
العمده جرى إيه يا شيخ الغفر؟!.. هو احنا فاضيين للهَم ده؟!.. احنا ورانا حالنا ومصالحنا يا شيخ الغفر!
شيخ الغفر طب وهنعمل إيه دى الوقت يا عمده؟!
العمده روح يا واد يا عوضين انت وبيومى لموا الفلاحين من ع الزراعيه ييجوا يطفوا الحريقه!.. وانت يا شيخ الغفر عايزاك تجيب الواد مسعود المصوراتى ياخد لينا كام صورة جنب الحريقه أبعتها المركز علشان تنزل فى الجرانين بتاعة بكره!
شيخ الغفر حاضر يا عمده..
العمده استنه.. خد ثلاثه غفر يفتحوا الجامع ويجيبوا شوية الحصر المفروشين فيه عشان ندى لكل واحد م البقر اللى اتحرقت داره حصيرة!.. وما تنساش تلم الحصر تانى بعد ما يصوروا وقبل الدنيا ما تعتم ويدخل علينا الليل!
شيخ الغفر هوا يا عمده..
العمده استنه يا وله.. مالك مصرمح كده؟!.. تجيب لى أبو دراع وفرقته يعملوا لنا شوية بروبوجاندا واحنا بنوزع الحصر!.. وما تنساش البت لواحظ تفقع لنا كام زغروتة حيانى من بتوعها لجل ما نشيل النكد من على وش الفلاحين!
شيخ الغفر أبو دراع خلاص يا عمده!
العمده يعنى إيه خلاص.. روح جره من قفاه وقول له العمده اللى باعتنى..
شيخ الغفر أبو دراع دى الوقت فى التراب يا عمده.. أروح أجيبهولك م التربه يا عمده!..
العمده مش بقول لك حمار!.. طيب مين دى الوقت بيغنى كويس؟!
شيخ الغفر ياه يا عمده!.. هو انت ما بلغكش إن المغنواتية كتروا الأيام دى!.. دا كمان فيه رجاله بترقص بالصاجات يا عمده!.. وعلى رأي المثل كثر البكا يعلم النواح يا عمده!.. تحب أروح أجيب لك أبو كف؟!.. أقولكشي.. أروح أجيب لك أبو سنه!
العمده ومين يا خويا أبو سنه ده؟!
شيخ الغفر أصل نص سنانه واقعه ومركب سنه دهب يا عمده!
العمده هو انت هتجيب لى مغنواتى سنانه واقعه؟!.. روح يا شيخ الغفر شوف لى واحد شديد حبتين يحْيلنا النيلة دى!
شيخ الغفر هو صحيح سنانه واقعه.. لكن ما يتخيرشى عنك يا عمده.. دا عليه حنجرة يا عمده وحياة سيدى ابوالمعاطى تنكد على بلد بحالها!
عوضين إلحق يا عمده!.. البلد ولعت كلتها يا عمده!