الحقيقة و الذكرى

النهاردة الشيء حقيقة.. بكرة نفس الشيء ده ذكرى
النهاردة بين ايدينا.. بكره جوه عقولنا فكرة
واللى كنا بنشكى منه.. ناس ح تاخد منه عبرة
واللى كنا بنحكى عنه.. في التاريخ حطوله نمرة
لسه كنا فيك يا توت.. من يومين بنقول يا مسرى
أصل لما اليوم يفوت.. بالقلم ونجره جرة
خمسة ستة سبعة تسعة.. بعد ساعة ح ييجى عشرة
غمض انت عينيك وفتح.. ح تلاقينا بقينا بكرة
شيء حقيقى وكان بيحصل.. شيء خيالى وبكرة يجرى
واللى كان شيء مستحيل.. تممه الإنسان بقدرة
لسه في الأحلام كتير.. لسه ياما نشوف ونقرا
كل واحد حقه يحلم.. بس تيجى الفرصة مرة
كل واحد فينا شايل.. الأمانى في بشرى سارة
نيته يعمل عمايل.. شيء لجوه وشيء لبره
بس خايف لحظة تندم.. والحقيقة تشوفها مُرة
اوعى بكرة تقول يا ريتنى.. تنقلب ذكراك لحسرة