تساوى ايه

خلال 3 سنين تقريبا . شوفنا فى الشعب المصرى حاجات كتير جداً مشوفنهاش خلال 30 او 40 سنه فاتوا والاهم اننا اتأكدنا ان الشعب اللى بيقعد ع القهاوى . واللى بيسهر للصبح . واللى بينام للمغرب واللى ع النت 24 ساعه, و اللى مديها طناش للدنيا . لو حاجه جات على عرضه او شرفه زى بلده ممكن يرمى كل الدنيا ورا ضهره ويقول بعلو صوته انا هنا و لأ. انا ده : اللى هو انا وانت و اخوك واختك ووالدك . وخالك وعمتك . وابن عمك . وجارك ونسيبك .وحماك . كلنا نزلنا تحت اسم ( أنا) شجبنا ... وعارضنا ...و عملنا بلد من اول و جديد .. عشان نعيش عيشه احسن . ونحس اننا آدميين ف بلدنا ، بعد ما كان حق اللى بيروح مبيرجعش . وبقى بالنسبالنا اننا نعارض ونتظاهر عشان حقنا . زى خروجه او مشوار بنعمله . ببساطه جدا ننزل نتظاهر ونعتصم . ونعلى صوتنا ونأيد ونعارض وبقى لينا مية رأى ورأى يتقال . طب يا مصرى ياللى ليك رأى وبتحارب علشانه . و عندك كل الاستعداد انك تسيب أهلك وبيتك و عيلتك . وتنزل عشانه بألايام . وتنام ع الرصيف . وايام متاكلش . وتوصل الموضوع احيانا للضرب والاهانه . عشان (انا ) هنا وعايز اعيش ويكون ليا كيانى . طيب ليه بنفس الحماسه والشجاعه والاصرار ده . متتعبش فى شغلك وتُصر انك تنجح . وتوقف شغلك على رجله . حتى لو بتشتغل فى الحكومه او فى مكان عجلته مش دايره ونايمه . ليه انت متصحيهاش . انت وتشجع اللى حواليك ؟! ومتقولش كل الناس نايمه هو انا اللى هصحى النايم !! ايوة انت اللى هتصحيه . انت مش نزلت الميادين ومسكت المايك وهتفت و زعقت . والناس قالوا وراك . وكان ساعتها تحت الشمس والواقفه طول اليوم على الرجل . لكن انت فى شغلك غاليا على المكتب وهما حواليك ... ومتحمسهمش بالكلام والصوت العالى لاننا مش فى ميدان . حمسهم بيك وبشغلك .. لان مفيش حد بيشوف حد احسن منه ف الاداء الا وبيزود اداءه لانه بيخاف يضيع جنبه ويروح حقه . و اعملها معادله .. زى ما بعلى صوتى ف الميدان = هزود ادائى فى الشغل زى ما بدافع عن اهلى وبلدى وبضرب اللى يعتدى عليهم = هدافع عن شغلى و زمايلى ومكانى زى ما بطلع من جيبى جنيه واجيب بيه اكل للناس وافرقه = هعمل كده ف الشغل و نزود شغلنا ساعتين . وقتها بس لما تقرر تطلب حقك ف زياده المرتب وتحسين الشغل . محدش هيقدر يقولك لأ ، لانك قدمت قبلها انتاج ورفعت شغلك للسما . ممكن تقولوا عليا متفائله او مش ف الارض اصلا .. بس كل شئ بالمنطق .يجوز . وأسوأ شئ انك تخلى الحماس اللى جواك مقترن بكلمه من بره اتقالت او لأ فأنت متسنيها ... خلى حماس من جواك . الى عندو هدف . هدفه هيصحى حماسه . اللى بتقولك الكلام ده هى اكتر شخص قابل لتكسير حماسه . لكن لما برجع ابص لهدفى . بقول جمله واحده بس بتصحى حماسى من تانى ( الجبل العالى كل ما بيتحدف بالطوب بيعلى اكتر واكتر ) يالا يا جبل