مبارك.. مفجر ثورة 25 يناير

رسالة إلى الرئيس المخلوع ..
هوا ازاى كل الناس بتتكلم عن إنجازاتك وناسيين أهم إنجاز!! غريبة فعلا. آه إنت عملت إنجازات كتير - كبارى وأنفاق و5 أمم أفريقيا (منهم 3 ورا بعض) بس الأهم من كل الإنجازات دى ثورة 25 يناير..
إنت أهم عنصر فى الثورة بجد مش بهزر، ودى وجهة نظرى
لولا حسنى مبارك وأولاده (قبل 25 يناير كنا بنقول وأحفاده إن شاء الله) مكناش عملنا كل دا!!
شكراً.. ظلمك فوقنا
الظلم والسرقة والنهب فوقونا، الضرب والإهانة فى بداية الثورة خلونا أقوى، وطلعوا أحلى ما فى كل مصرى بجد. يعنى هما كل ما بيضربوا أكتر بيضعفوا وإحنا بنقوى، كل ما بيضربوا أكتر بيشيلوا الخوف من جوانا.. شكرا بجد.
مش عشان الدورى ممكن يتوقف وأفسدت فرحة الزمالك بالمركز الأول والمئوية لأ خالص. إنت خليتنا نتغير وعرفنا قيمتنا وطردت الخوف من جوانا وعرفنا إننا بنحب البلد دى بجد وبنخاف على بعض . دا غير إنك من غير ما تعرف كدا قضيت على فساد الشرطة وخليتنا نشوف وشها الحلو.
أنا عارف إنك قلقان علينا دلوقتى بس مش عاوزك تقلق خالص، من النهارده الشعب هيعيش فى سرور وعز ومفيش سعر غالى، قصدى أقولك إن كله هيبقى آخر جمال.
بس فى شوية ناس كدا مش تمام عملت فى بلدك حاجات مش تمام، وطبعا دا كان من ورا دهرك إنت ولا تعرف حاجة عن الكلام دا.
هوا إنت يعنى هتشوفهم بيسرقوا وينهبوا ويزلوا ويعزبوا ويقتلوا ويضربوا ولادك وإنت هتسكتلهم؟؟ لا طبعا كله من وراك.
بس فى كلمتين عاوزك توصلهم للناس دى:
ياللى إنتو بتقسموا وتخططوا وترسموا
كفاية سرقة ارحموا أهى بانت خيبتكوا
أنا مصرى زيكو ومصر دى مش ورثكوا
ما تحسوا على دمكوا الله يخرب بيوتكوا
قسمتوا التورتة.. طب إحنا مشوفنهاش