راوية و منصور

وبسافر ..
على طرف شفايفك
والقانى ..
لسانى مسكون باحزانى
انده م الشط التانى ..
مين يسمع صوتى ..
وانت السيبانى
على طرف شفايفك ..
عايش وحدانى
مسجون بين الشط
وبين المية ..
غرقان ..
مش طالب منك ..
غير قشة حنية
فينها عيونك ..؟
كانت مداوية
كنت اسمع ضحكتها ..
مع ثومة بتردد اغنية
فينها عيونك ..؟
ليه اتغطت بالنسيان ..؟
ايه غيرها ..؟
ليه غاوية ترمينى على الحرمان ..؟
كانت جنة ..
نيل وفرات .. وسرب حمام
لو احزن ..
كانت تدهنى .. بالضحكة الصافية
كانت ترقينى ..
وجنبى تنام
نضحك طول الليل ..
من كتر الفرحة مكناش بنام
كنا عايشن ف سلام
***
كانت راوية وكان منصور
راحت راوية
وراح منصور
ملاعين احنا ..
عايشين ف زمان بيدور
***
كان منصور ..
ف شبابه صبور
وكانت راوية ..
بالحب النابت ف عنيها ..
بدر بدور
دبل الحب الاخضر
تاه ف هموم الدنيا ..
***
نسيت راوية الحب
وافتكرت ..
بس الواد والبت
نسيت كل اغانى الست ..
نسيت واد بيموت ف عنيها ..
ونسيت انها اجمل بت
***
مسكين منصور ..
والله الفين معذور
مسكين قلبه ..
م الاحزان معصور
مسكينة الراوية ..
حتفوق بعد ما يطفى النور ..
وف قلب الضلمة ..
حتدور على منصور
لجل ما تلقاه على طرف البحر
قاعد بيداوى ..
ف قليبه المكسور