المقامة الجنينية

حكالنا حنفى بن تامر :-
فيوم اخدت خطيبتي , اللى تعتبر قريبتي , وقعدنا فجنينة , والازهار حوالينا , والنخل والنحل , كات قاعدة مالهاش حل !!
وغنينا انا وهي , اغنية عاطفية , كلماتها بتقول :- (هنروح الجنينة , ونشبك ايدينا ) !!.....غنينا وبعد شوية , قطفتلها بايديا , من ع الشجرة تفاحة , واديتها التفاحة , بشياكة وحساسية , وبكل رومانسية , ..بصيت فجأة لقيتها , خطفت التفاحة , من على ايدي ب بجاحة , زي المفجوعة كلتها , ..بصيت لها وانا مبرق , مصدووم ومش مصدق , بقا دي بت رومانسية ؟؟ , ودي قعدة رومانسية !!! ....بعدين قولت لنفسي , ما بيني وبين نفسي , :ف الخطوبة مسروعة , ع الاكل كدة ومفجوعة ؟؟!!! , امال دي هتاكل ازاى , بعد الجواز؟ ياباي , م اللي بيخفوا الحقيقة , اه م الكدب والخداع, وفضلت سرحان بتاع , تلت تربع دقيقة , فجاة لقيتها بصت لي , وبنحنحة قالت لي , : ساكت كدة ليه مالك ؟ , ياترى سرحان فأيه؟ , فيا والا ايه ؟ , قولتلها : ايوة فيكي , طبعا الله يخليكي , ليا ..ضحكت ومالت , عليا شوية وقالت , سمعنى آخر اعمالك ,ف الكتابة و الشعر , انا مؤمنة بموهبتك , انت طول عمرك شاعر , متدفق المشاعر , وهتبقى لك هيبتك , انشاء الله ف الشعر , هتبقى عظيم الشأن !! , زي نزار قباني , ومنصور الرحباني !! , قولتلها : الله يخليكي , تسمعي ايه يسليكي ؟ , شعر والا دقن ؟ , أقولك شعر حر ؟ , قالت لي : انت حر !! , المهم سمعنى , حاجة على ذوقك يعني , حاجة تكون رومانسية , مناسبة للقعدة ديا ,.... حاجة برايفت ليا , قولتلها قصيدة (نينة , وانا قاعدين ف الجنينة) , :-
سألت عنك الشجرة ...حبيبتي ما جاتش ليه
فاجابتني الشجرة ..........عبيط دة والا ايه
وجاتني تحت الشجرة ...حبيبتي زي العادة
اه وكتبنا على الشجرة ...أسامينا من السعادة
وصافحنا غصن الشجرة ...إيد ممدودة لنا
ومع جذور الشجرة .............دفننا سرنا
ولقينا تحت الشجرة ....الحجة وهيبة كمان
قولنالها تحت الشجرة ...يامة كلنا البرتكان !!
زعلت مشيت وسابتنا ....حلفت ماهي داخلة بيتنا
طلعنا فوق الشجرة ............مالقيناش ابي
اه يا طالع الشجرة ........هات موزة والنبي !!!
وطلعنا فوق الشجرة ...........وكأننا قردان
وقعدنا تحت الشجرة ...........زي أبو قردان
ونمنا تحت الشجرة ................كالمتشردان
واما قطفنا من الشجرة ..........التفاحة واكلنا
انا وانتى تحت الشجرة ..صاحب الجنينة جالنا
ادنا علقة سخنة ...............بالشلاليط والقفيان
فجأة انا وهي لقينا , راجل داخل علينا , بجتته الضخمة , ومشيته الفخمة , قولت : دة صاحب الجنينة , اللى هينزل علينا , بالشلاليط والقفيان ؟؟ , وقولتله ب جنان, وعصبية وحنان ,: والله ما انا يا حج , والمصحف ما انا يا حج , والله ما قطفت حاجة , ولا اكلت حاجة , هي البت دي ,اهيه البت دي , اللي كلت التفاحة , وقطفتها ببجاحة , قعدت اقول لها عيب , ما تاكليش م الجنينة , لا صاحب الجنينة , يجي يتغابا علينا , قالت لي : العيب ف الجيب , انا اصلا ما اتعشيتش , انبارح ما اهتميتش , بكلامي ليها سعادتك , تقدر تضربها سيادتك , عادي (من حكم , ف جنينته ما ظلم ) !!
قال : هي ما اتعشيتش , ياحرام.. معلش , احنا بقا هنعشيكو , عشا جميل وسخن , وع الأسفلت السخن , يا حبايبي هنمشيكو , يا نايتي يا كيمو يا شيكو , اشكالكو غلط , شكلكو لبط !! ..., بصراحة انا مش طايقكو , وروني بطايقكو , قولتله : إظهر وبان , إنت ف قسم اللبان , مخبر صح كدة يا مان ؟ , انا شوفتك هناك زمان , قال لي : صح الله ينور , يا اهبل يا وش مدور , تعالولى كدة بالذوق , انت والسنيورة , قولتله : بص العصفورة ,فلقيته بص فوق !!
قال حنفي بن تامر : واخدت بعضي وجريت , لحد ما استخبيت , وبقيت فامان مؤكد , ما بين الشجر , ومن بين الشجر , تابعت انا المشهد , وقعدت أبكي من طيبتي, على منظر خطيبتي , والمخبر جايبها , من ايدها وساحبها , ودموعها بتسيل ,..... قولت فسري : تستاهل , لأنها بالساهل , أكلت التفاحة , بمنتهى البجاحة , كدة منغير غسيل ......والختام