المقامة الفسحية

حدثنا حنفي بن تامر فقال :
بعد العمل والمشقة , دخلت عندي الشقة , لقيت مراتى المصونة , الجوهرة المكنونة , بتقولى : عاوزة اتفسح , انا قربت اتكسح , من شغل البيت والهدة , والزهق والقعدة , والعيال وقرفهم ,ما انت ولا تعرفهم , عايش ولا حاجة فبالك , خدامة انا بالنسبالك, انت ما بتحبنيش , انت ما بتخرجنيش , قولتلها : يا متفرعن , حاسب زمانك ارعن , ليه تظلميني معاكي , دة انا دايب فهواكي , شوفي عايزة تروحي فين؟ , واللى يا نور العين , تامريني بيه , انا خدامك فيه , قولى وانا هاريحك , ومن عيني هافسحك !! , استني لحظة افكر , قالت لي : انا فكرت , تيجي ننزل محلات , نشتري حبة حاجات , ليا انا والعيال ؟ , قولتلها : انا والعيال ؟ , تفكيرك عال العال , الله عليكي يا طنط !!! استني لحظة افكر , في فسحة حلوة لينا , في حتة كدة تليق بينا , هو احنا اى حد ؟ , وفضلت افكر لحد , ما صقفت على سداغي , وكهربة دماغي , وصلت تمانية فولت , وبعد دقيقة قولت , : ايه رايك نركب توكتوك , ونمشي بيه ع الحركرك , من جمصة لبلطيم , وهناك نقضي اليوم , ونمسك لبعض شوم , ونلعب سوا تحطيم ؟ , والا اقولك حاجة أظبط ... , ايه رأيك ننزل مصمط , ناكل كرشة وكلاوي , على فشة وعكاوي , مع أي حاجة سمينة , , وبعد كدة انا وانتى , نحبس يا حبيبتي ,باربعة شاي ف الخمسينة؟ , طب تيجي نجيب بلالين , انا وانتى ونيجي طالعين , برج النزهة وننط , دي متعة يا ضي سنيني , البلالين صدقيني , عملية عن الباراشوت !!! , طب اقولك حاجة تانية , تيجي ننزل الملاحات ؟ , وناجر هناك فلوكة , من عند الشيخ ملوكة , طب اقولك حاجة تانية, تيجي نروح الواحات ؟ , نشرب مية جوفية , من بير الشيخة وفية ؟
لقيتها بقت مذهولة , مندهشة بدرجة مهولة , قولتلها بكل سهولة , : شوفي يا حياتى , يا هدية حماتى , انا مش باحيرك , انا قصدي اخيرك , بين الفسحة والتانية , ومعاكي الوقت ثانية , تفكري على مهلك , على امهل من مهلك , ولو انى باقول يستحسن , نقعد في بيتنا دة احسن , لنا دة اللى خرج من داره , انقل مقداره , لسه هناخد وصلات , ونركب مواصلات؟ , ونتبهدل ف الزحمة , دي الزحمة عدو الرحمة !!! , مافيش حاجة مأمونة , والسكة مش مضمونة , مليانة حوادث , قطاع طرق كوارث , وبعدين وانتى الاصدق , الواحد ما بيصدق , يجي من شغله قوام , علشان يخش ينام , ساعة في قلب بيته , ويعد مع اهل بيته !!
شكلك موافقة ع القعدة , بدل المشورة والهدة , والحوجة لكل حي , وعملت بالظبط زي , الدكتور فتحي سرور , لما بياخد موافقة , م الناس ال مش موافقة , ويقول : موافقة , فقولت : موافقة , بصت لى هيا بحيرة , وبغل وذل وغيره , وقالت لي : ميرسي , على افكارك دي , تصدق خففت شوية , م الزهق اللى كان عليا؟ , بكلامك دة سليتني , بصراحة انت شليتني , دة انا منك اتشليت , مش عايزة اخرج م البيت , شكرا خليني قاعدة , وادي ياعم قعدة !!
قال حنفي ابن تامر : بعد ما قعدت ع الكرسي , انا قولت : مدد يا مرسي , بعدين قطعت الكلام , ودخلت بسرعة انام , وانا فرحان من نفسي , علشان قدرت اقنعها , بالقعدة وبمنافعها , وبافكاري المتفائلة, مش برضة الست العاقلة , مالهاش غير جوزها و بيتها , ودة أساس تربيتها؟؟؟!!! .....والختام