المقامة البعد مباركية !!!

المقامة البعد مباركية........حكالنا حنفي بن تامر وقال :-
رحت انا للحجة تبارك , أسألها عن (مبارك) , وعن الحياة في عهده , وعن الحياة من بعده , قالتلي : هو قالها , (انا واما الفوضى) , وراح هو وجت الفوضى !! , ياريته ما سابنا يا ابني , بقا فيه انفلات امني , دة غير ازمة سولار , وحوادث قطار , وانقطاع تيار , وانهيار عقار , و وتحرش واغتصاب , وتلتميت نصاب , وعامل لنا فيها ملاك , و (انقاذ وطني) و(بلاك , بلوك) حرنانين , ما بتقراش الجرانين ؟ , انت ايه مش متابع ؟ , قولتلها : ساعات باتابع , يعني يا حجة تبارك , قالتلي : مشوا مبارك !! , قال ايه خافوا انه , يورث بعده ابنه !! , وايه يعني حسني مبارك , يجي بعده جمال مبارك؟ , طب ما (حافظ) الحمار , جه بعده ابنه (بشار), ولا حد اعترض , ولا حد افترض !!!
(مبارك) كان حسيس , حرام مكانشي خسيس , مارضيش يعين ابنه , مع ان المفروض ابنه , الأولى بالتعيين , مطابق للدستور , والقانون ومنشور , (أبناء العاملين ) !!!
وبرغم دا كله , الناس كانت تقول له , عين (جمال) رئيس , يرد هو على طول , فساعتها ويقول , انا ضد التوريث , قال كدة من زمان , قبل ما ينزلوا الميدان , ويطلعوه مدان , ويقولوله : أرحل , ياريتهم قالوله : افضل !!
كنا قبل (مبارك) , شاكرين فضله وحامدين ,مش دة تبع (حمدين) , ودة تبع (البرادعى) ؟ , والله يا ابني بادعي , ع الثورة وع الثوار , وانا ساجدة ليل نهار !!!
قولتلها : وماله ادعي , ما انتي لكي حق تدعي , على قولك الثورة لمت , اه ( يا ثورة ما تمت , خدها المرشد وطار ) !!
كان العشم ف الثورة , نلقى دولة (تسعنا ) , وحكومة (تسمعنا ) , على راي الحج (مهنى ):-
(يبقى همنا ع الانجازات .......مش يبقى يهمنا على الاجازات ) , قالت لي : طب ما مبارك , انجازاته يامة , قولتلها : فعلا يامة ,
عن انجازات (مبارك ) ......... .....اليامة يامة قيل
كان الموظف فاتح........ ...(بابه) و(درجه) للكل
مادد ايده ( بيساعد ) .... ......مش مادد ايده ذل
(كله بيخلص) نهارك ... .......أبيض صباح الفل
اما (الرشوة) واما ........ ...(الروشة) والتعطيل !!! -
كانت الدولة (متحف) .... .......مليان (بالحفريات)
ماشية ب(صادر ووارد)... ...لا فاكس ولا ايميلات
قايمة على (العواجيز) .... ...وعلى (جري الستات)
قايمة على قانون .......... ..صادر من (عام الفيل ) -
وكان قضائنا عالي ................(شامخ ) (عادل) (نزيه)
ينصر وينصف كل ...........................اللى بيلجأ ليه
كانت المحاكم تحاكم .......................الواحد باللى فيه
كانت (حبالها طويلة) .... .. ...وكان نفسنا (طويل) -
كان في وقته الكرامة .... ... ..عنوان لينا المفروض
كان المواطن فعهده ...... ..(فرعون) عصره (نمرود)
حد (اتسحل) ف (القسم) ؟ .... حد اتقتل ع (الحدود) ؟
حد (اتجلد) ف الخارج ؟ ...... ...حد اتباع بالقليل ؟ -
يكفي حكومة (نزيف) , قصدي حكومة (نظيف ) ,
كانت حكومة لطيفت ...........الاوجه والسداغ
كانت حكومة نظيفت............ الايدي والدماغ
و(القطنة ما بتكدبش )......صريحة ما اقولكوش
دي الشركات كات (بتسرح)..... موظفها المنكوش
يا سلام على دي حكومة , كان مبداها (النظافة , من الايمان) بلطافة , وبأسلوب جميل , كانت بتقوم بغسيل , (المخ ) و (الاموال ) , كان موالها موال , على هذا المنوال !! ,
صح يا حجة تبارك ؟ , قالت : يكفي ان مبارك , بشر بيه المسيح , , قولتلها : ايه دة ؟ صحيح ؟ , قالتلي : اه صحيح , مش عيسى ابن البتول , في الانجيل بيقول , ( مبارك شعب مصر ) !!!
قال حنفي بن تامر : قولتلها ( بانفعال ) , انتى بتخطرفي , والا بتخرفي ؟ , والا بتحرفي؟ , كلامك عدس بسارة , بقا مبارك بشارة , ف الانجيل دة كدة عجة , وعملت الجملة دي حجة , عشان اسيبها وأجري , وانا على الله أجري , قبل ماحد يسمعنا , من الاخوه الاقباط , وتقوم فتنة طائفية , ونبقى انا وهي , شهداء الاستعباط ....والختام